2022年3月17日
噚日揀咗隻恒指熊(57602)，捉到位喺上半場裡面完成整個動作，呢一Round快執平均賺幅有15.73%。下半場返嚟初初都見指數處於五分鐘圖保歷加中軸之上，Slow STC(14,3)兩線亦都見上行，下半場開市後15分鐘，恒指發力向上，中段嚟出一個消息話國務院鼓勵企業「走出去」，呢下攻勢確實非同小可，或者重點唔係個消息，消息都只係一個借口，個市實在跌得太多同太耐，好友太餓了，如同一班飢荒嘅小朋友一樣，有得食就係咁食，即使飽到嘔都要食，因為唔知下一餐係幾時，暴力反彈因而形成。
隔晚美國聯儲局宣布加息0.25厘，今日恒指再見大幅度回升，開市升1343點，報21430點，早幾日十幾層牛證街貨咁打，今日風水輪流轉，完U後即殺12層熊證街貨，雖然只係得頭兩層嘅熊證街貨比較多，但本著多多益善，少少無拘嘅情況下，計落都有2812張期指被殺。呢一下再彈，日線圖上見月來受阻嘅10天線都以裂口彈高埋。依家10點正，恒指高位暫時見21471點，算是踩入咗3月7號嗰下跌裂口範圍(21838至21327點)，如果(我話如果)，今日呢個高位見咗啦，聽日返嚟恒指再嚟多個裂口向上，而低位係高於3月7號個下跌裂口頂部21838點嘅話，咁由3月8日開始至到今日嘅呢堆恒指，成舊嘢嚴格嚟講可以叫做「孤島底」，係一個幾強嘅利好訊號。
依家10點7分，指數暫見高開低走，喺小時圖上就會睇得比較清楚，事關今朝恒指開市mark住嗰位就剛好喺100小時線(小時圖100線)之下，遇阻回落似是合理，或者更合理嘅係呢兩日出手撈貨嘅，短炒獲利盤今朝大幅湧現，所以指數先至會稍稍向下。
誠如噚日喺[下半part]所講，到底呢一下反彈係大回小漲，還是終極一跌之後出現嘅絕地反彈？其實不論從週線圖或者月線圖上，都見到經過呢兩日(噚日下午至今朝)恒指大幅反彈之後，圖表上已經留底咗一條長長嘅下影線，算是一個利好訊號，代表咗指數係有下跌過，但其後被資金托返上去，升市係需要力度同資金(消息都只係一個借口或引旨)當兩樣件事集齊之後就會見返升勢，問題只係可以維持幾耐。
頭先開講「孤島底」，路過隻平保(02318)就真係見到「孤島底」，今日裂口上行嗰裂口，位置剛好同早兩日裂口下行嗰裂口位相約，再加上「孤島底」嗰兩粒燭由「身懷六甲」所組成，Slow STC(14,3)喺呢兩日有邊隻係唔見觸底架。
平安牛(64152)，收回價45元，同現價有約15.4%差距，全場最貼價，所以槓桿都係最高，有約6.65倍，少少代價係街貨都有18%，尚算可接受嘅範圍嚟嘅，一般高於20%先至唔好揀啫。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
