2022年3月10日
噚日晏晝再喺電台做嘅舊同事試做第二次Live節目，很土炮的但倘算比第一次好，以我哋兩個「得啦、是但啦」嘅性格，隨時下個星期就嚟料都未定(再傾多Round先)；正正就喺呢個時侯，恒指原來落到20102點之後止步，以2點之力保住20100至20199點剩底嘅牛證之餘，20000至20099點嘅牛證亦絲毫無損，之後指數繼績上，一彈就彈到四點鐘先肯收手，而中途更彈穿過恒指熊(52475)嘅止蝕位，就係小時圖嘅10小時線(小時圖10線)。
恒指噚日喺臨收市前10分鐘，進一步向上突破，重上20600點以上位置，同時亦喺呢個時候，小時圖升穿咗10小時線，觸發咗(52475)止蝕機制。以噚日臨收市前10分鐘走隻(52475)，按當時高低位做過0.21元/0.198元計，平均沽貨價為0.204元，對比星期一 (3月7日)嘅平均買入價0.1395元，呢趟平均賺幅有20.19%。過咗三日夜計唔算係一個好好嘅賺幅(如果做緊試Live時見到恒指咁飆法，一早走鬼咗佢食得仲大)，不過總好過白做，甚至倒蝕；至少補得返今個月我第一注輸咗嗰19.x%先啦。
噚日接近傍晚時分，見到大家都話收到政府嘅一個國家級Alert Message，個聲仲係疑似俄羅斯打到嚟大家要去防空洞避難，或者係打Biohazard實驗室自爆之前嘅warning，而Message嘅內容相信有無收到嘅都知，就係話伊醫轉為只收新冠確診病人嘅醫院，其他病人麻煩你去第二間啦(Bye!)。認真，偉大嘅港府喺上年花咗(納稅人)1.5億一早整咗個(無人知嘅)緊急警示系統，而噚日率先啟航發出一個(一啲都唔知急乜)通知，但係(作為納稅人十幾年嘅)我係完全無收到，屋企一家三日，得兩個人類有手機，我家老爺有收到，FB噚晚一開首20個Post有13個話自己有收到(有圖有真相)，有一個大學同學同我一樣都係有開住個Alert但係就乜都無收到，我...是咪屬於被遺忘嘅一群？(;￣ー￣川Anyway，I don’t care！
今朝起身見隔晚歐美股市造得好好，德國DAX仲升成千點，今朝港股都應該做好，完U之後見指數大裂口升400幾點開市，重上21000點以上水平，而小時圖上噚日見上破10小時線之後，今日仲企咗喺20小時線(小時圖20線)之上，只係小時圖保歷加通道有所收窄，同埋日線圖見，只能暫時話今日彈高隨時係受惠於噚日條長下影線所致。
咁樣嘅走勢都真係難以斷定指數係咪出現轉勢，五分鐘圖偷好倉出都仲可以嘅，日線圖就咁嚟說服話轉勢就真係有啲難啦。所以今朝喺作戰室裡面第一注出淡倉，先博指數行出高開低走格局，其實我都唔貪心，呢注淡倉爬格仔落到五分鐘圖50分鐘線(五分鐘圖10線)就收工兼反手，可恨指數喺開市後有稍稍向下之後，指數就喺1250分鐘線(五分鐘圖250線)以下位置橫行，等返50分鐘線上嚟接佢，同步見到保歷加通道口仍然拓闊中。Slow STC(14,3)亦都喺超買範圍扭擰完之輪，怕且今日作戰室第一注淡倉隨時要反手變返做好倉。
恒指牛(55693)，收回價20678點， 離現價有約351點就知呢注幾進取，因為咁所以槓桿先至會有約46倍，依家10點20分，喺五分鐘圖上見到指數有稍稍失50分鐘線，It’s fine，基於目前見整條保歷加通道都係呈上中，咁就等指數回落至中軸時見支持先至出場啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
