2022年3月9日

【輪證贏家】恒指弱勢未改 熊寶寶仍在手

今朝起身開電視如常地睇新聞，第一眼就見到條直簽：消息指政府最快今日起每日設疫情記者會由特首主持。What？41萬月薪嘅首長真係咁得閒？話時話張竹君唔見咗幾日，去咗邊呀？唔係中咗所以出唔到嚟呀？咁你要快啲好番啦！(其實呢兩日我都Feel到個人有少少㷫㷫地)

依家9點41分，恒指今朝開市微升50幾點後，至依家升幅擴大至升逾140點，喺五分鐘圖上見指數踩住50分鐘線(五分鐘圖10線)同100分鐘線(五分鐘圖20線)上，其後中穿埋250分鐘線(五分鐘圖50線)，喺保歷加通道口拓闊緊嘅情況下，Slow STC(14,3)兩線出超買再超買嘅可能性甚高，所以今朝都有喺作戰室嘅第一注就係出好倉追返指數上行。

「咁咪怪囉？！之前仲出住隻恒指淡倉嘛，今日又出好倉咪兩邊都揸住囉？」無問題架，你只要你搞清楚呢兩注係用於唔同嘅圖，同唔同嘅策略就可以架啦。作戰室嘅好倉好明顯係即日嘅，至於前日揀咗隻恒指熊(52475)到依家仍然在手，呢注講明係以日線圖做Trade就放耐啲架啦，當然，如果你都同我一齊揸緊隻(52475)而數夠數想割韭菜嘅，我又點會阻你呢；又如果打算淡到20000點嘅話，咁之前Set定嘅止蝕位(上破3月7日嘅高位21327點)就繼續奉行啦。

10點未到已經見到個notification話今日11點，月薪41萬嘅特首會出嚟見記者，點呀？係咪要進行全民強檢啦？咁除咗指數之外，係咪又要睇返住隻香港探索科技(01137)呀？

不過今日見隻香港探索科技日線圖走勢麻麻，整條保歷加通道向下之餘，股價都未踩到保歷加通道底線，比較理想嘅係Slow STC(14,3)兩線都處於超賣水平，有望喺超賣位度出現觸底，只係寄望股價喺保歷加通道底線至中軸運行住先啫。依家更係唔搞佢住啦，等41萬月薪出嚟噏乜好過。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。