2022年3月7日
上個星期五(3月5日)喺【下半場】揀咗隻恒指熊(50226)出嚟，講明只限DT，不作過夜。本身入市箭略係偷位以指數喺五分鐘圖上唔到保歷加通道中軸而入，不過，喺上個星期五下半場保歷加通艸窄過鬼，指數其實兩三下手勢都已經上破，但係都仲有位可以吼嘅，就係用返Slow STC(14,3)嚟入。喺上個星期五下半場2點至2點15分，Slow STC(14,3)兩線上到超買至嚴重超買水平，雖然保歷加通道仍然都係咁窄，但(50226)係全場最高槓桿嘅熊證，以當時(50226)高低位做過0.093元/0.087元計，平均買入價為0.09元。
受制於保歷加通道口唔闊嘅影響，指數可活動嘅範圍真係好有限，未幾指數上到保歷加通道頂線後回落，同步Slow STC(14,3)都向下做Swing Trade，3點未到Slow STC(14,3)已經落返去超賣水平，喺2點50分至2點55分(50226)高低位做過0.099元/0.093元計，平均沽貨價為0.096元，即平均爬到六個格仔或者6.67%，講緊一個鐘唔夠喎，爬格仔算係咁啦。
而喺上個星尾市時段喺五分鐘圖見Slow STC(14,3)兩線向住超買至嚴重超買水平上行，揀定隻恒指淡倉比作戰室裡面嘅戰友睇睇大家有無興趣小注出倉過weekend(予其話興趣，倒不如話係過夜持貨能力)；當然，我身邊都有唔少朋友話我：唔係掛？仲出淡倉？跌咗咁多日都夠啦。結果，今朝恒指未開市見黑期跌逾500點，而恒指開市跌596點，報21308點，已經喺作戰室同戰友s講如果有淡倉過咗夜嘅，喜歡就食半留半，食晒都得(人家計完數想食我無得阻止架，都唔應該阻止，有食唔食咩？)，無貨嘅就真係要搶淡倉，係貴同難搶架，但喺開市時見恒指五分鐘圖上Slow STC(14,3)只係剛剛喺高位回落，同超賣仲有一段距離，真係仲可以有得追跌。
及至依家9點34分，恒指正式開市，指數再向下跌多200點左右，牛證首八層街貨全數死亡，呢度夾埋有相當於4457張張期指。10點未到指數已經跌咗逾900點，21000點宣布失守，亦都到咗喺作戰室今日即市淡倉目前21000至21099點呢層牛證全數死亡，total今日開市未夠半個鐘就食咗5393張期指街貨。10點未到指數跌夠過千點，今朝作戰室追到淡貴嘅第一下都真牙痛咁肉赤，但呢啲時侯就係貴買貴賣，而指數都向下再殺埋20900至20999點，再多145張期指至5538張期指。
作戰室有戰友問到：「21000點都無埋嘅時侯，咁下一個目標係幾多？」常理跟落其實都係用返大點數、齊關口位如20000點(尤甚啦，涉及到第一個位數字嘅數)做支持量度。事實上都見到週線圖上恒指Slow STC(14,3)兩線落到超賣至嚴重超賣水平，希望可以停一停；不過，當天線同保歷加通道都做唔到有效量度嘅時侯，咁我哋就要出動Fibonacci去畫線。以仲可以包住恒指嘅高低位(即2018年高低及2016年低位)呢個範圍拉出Fibonacci的話，好抱歉依家指數已經落到最後一格嘅Fibonacci位，換言之，一旦20000點呢齊點數、大關口位失守的話，咁2016年低位見。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
