2022年3月2日
天氣終於回暖咗好多，我家肥貓都無再縮埋一舊嘢咁，開始攤返開啲肥肉曬下太陽；雖然未至於盛夏天氣，但亦難為了一眾港人為唔知幾時、唔知幾耐、唔知點樣、唔知做唔做嘅「封城」而做定準備，的確，近日不論超市、藥房、街市、百貨公司都大排長龍，就連759呢類較細型嘅超市都人頭湧湧，初初真係有諗過：唔係掛？香港人又買爆？哦，原來係因為有啲員工佢哋確診咗需要在家隔離，所以唔夠人手上貨，造成空架嘅情況啫。其實，夠食就得啦，不過我都明白大家買定都係怕當政府落實嗰一刻先嚟買嘅話，怕一早被人買晒又唔夠人爭啫，真係...《來生不做香港人》真前瞻。
依家10點8分，恒指開咗市，不過作戰室裡面嘅戰友未開到餬，事關今朝見指數完U低開之後，都喺作戰室同大家講定可以出淡倉幫自己手上嘅好倉先做對沖(噚日恒指五分鐘圖Slow STC(14,3)兩線收喺超賣水平，正路係小注出好倉博出Swing Trade嘅，唯一輸嘅係Slow STC(14,3)行超賣再超賣囉)，又或者無貨過夜嘅直接出淡倉博保歷加通道口再向下，甚至落埋去殺第三層牛證重貨區。不過，嚟至10點13分，指數低開後高走咗少少再沿返條保歷加通道底線向下至今，指數擺位同今朝開市都係差唔多，見小時圖保歷加通道仍然Keep住橫行咁款，都估到今日隨時又見悶局。
本身早兩個交易日見恒指日線圖出咗「錘頭」，噚日都叫做見返支久違了嘅陽燭，都真心有一刻以為指數可以轉勢，可惜未見有，指數再落，就算依家日線圖上Slow STC(14,3)嘅%K線高於%D線，但兩線勢頭都唔見呈上，咁又有咩意思？技術分析 VS 街貨呢啲情況真係見得多，隨時同出糧一樣一個月一次，而今次牛證街貨都真係唔弱，明白熊證有新增街貨層出現，但係數量真係無得比。
恒指熊(68154)，收回價23300點，同現價有逾410點差距，槓桿有近35倍，其實DT都可以，吼五分鐘圖見Slow STC(14,3)上到超買位嘅話就小注出場啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
