2022年3月1日
噚日恒指下半場愈升愈有，最終將指數跌幅縮窄返至跌50幾點收市，本來set好當恒指五分鐘圖失250分鐘線(五分鐘圖50線)就隻恒指熊(65271)，但問題在於唔係指數失250分鐘線，而係指數上破咗250分鐘線，所以(65271)無得落場。而噚日收市後同電台錄完音就拿拿聲同我家老爺落樓，睇下仲有咩物資喺屋企需要而仲可以買到嘅，買返去看定門口，結果，我漏咗出2月份嘅【月度報告】，今日會出返，抱歉(採購會令人沖昏頭腦)。
依家9點42分，久違了嘅完U見升終於都出現，恒指今朝開市微升26點，到正式開市之後，指數一度衝高到22800點樓上，升90幾點，依家當然回落返。其實，今日恒指日線圖個樣真係好係一個「觸底樣」，又跌咗咁多日，獲獲都跌得咁金，搵鋪彈高返少少真係不為過，如同超市一樣，唔加價何來有價減。但另一邊廂，今日見恒指牛熊證街貨圖，恒指噚日下半場雖然跌幅收窄，不過指數仍然靠近下方牛證街貨，而牛證街貨又愈儲愈多，反映到唔少資金都想博反彈。呢啲只咪又係技術分析 VS 街貨嘅局面囉。
依家10點12分，恒指高走過後掉頭回落，還好早早喺聊天室見到指數喺五分鐘圖失50分鐘線(五分鐘10線)時已經嗌出淡倉，到依家嘅話應該都爬到幾格，唔貪心隨時收割埋添。貪心啲嘅話，見小時圖一日未上破得到條20小時線，一日都仲咬住隻淡倉，博指數向下再殺牛證重貨都仲得，只係擔心保歷加通道收窄，變成唔係指數上破20小時線失守，而係20小時線跌穿條指數咋。
恒指熊(67820)，收回價23050點，同現價有逾410點差距，換股比率12000，所以槓桿有39.9倍，但勝在呢個距離之中高槓桿又安全，怕且再隊個市淡倉，依家呢轉係水尾啦，小心行事。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
