2022年2月28日
截至噚日為止，香港新冠肺炎有逾兩萬宗確診，唔單止醫院病床同急症室壓力爆煲，由於死亡個案都有上升趨勢，所以開始連殮房頂都唔順；政府話情況仲有上升趨勢，其實依家唔少公司都已經AB Team或者全天侯WFH，可鄰有啲工種真係無得WFH，我身邊就幾個朋友係咁，特別係點開廠做新聞嗰班同學，WFH極都要搵個人返去On Panal(而佢公司唔同部門嘅同事都開始陸續出現確診)。
今朝起身無耐就先同作戰室嘅戰友睇返星期五遺留咗個咩嘅牛熊證街貨圖出嚟，一睇見到就算熊證再有新增街貨層，但個市實在向下跌得太快，根本都追唔到個跌幅，今朝早恒指開升50點，其實都真係唔係好得去邊，或者只係今朝道指期貨由跌逾500幾點收窄至跌逾300幾點，所以恒指開市先見升。到正式開市之後，指數出高開低走，稍睇定五分鐘，已經喺作戰室裡面同大家講可以出淡倉。再喺個股堆中遊魂咗一陣返番去指數之後，恒指已經跌逾200點，依家9點48分，恒指暫時最低見過22487點，今朝作戰室如果戰友有一齊出到淡倉嘅話，本身訂下嘅22500至22599點牛證全死，同埋Slow STC(14,3)落返去超賣呢兩個目標都已經順利達成，再貪心嘅，就博22400至22499點全港牛證都死埋啦。
「其實日線圖上見到Slow STC(14,3)都已經落到嚴重超賣水平啦喎，恒指會唔會開始識得停啦？」真係好難講，第一，依家個市(唔止港股，應該係環球股市)都係睇住普京同連澤斯基兩個人想點，但以目前情況睇，一個想打仗，那怕你西方國家出一系列嘅制裁，佢有核威懾部隊棟喺度等你；另一個想同佢坐底傾傾，但就無人So佢。話分兩頭，國際關係呢科我係唔合格嘅，不過見到連澤斯基第一個感覺係覺得佢係一個好貼地嘅總統，或者係佢件圓底短袖、極似uniqlo tee有關掛，真係未見過一個總統出嚟講嘢著件tee，「咁人哋打緊仗嘛，邊得閒襯衫啫」咁你睇下普京。
第二，純技術分析，日線圖見保歷加通道仍然拓闊中，換言之，指數仲有再下行空間，咁Slow STC(14,3)被迫行出超賣再超賣嘅可能恒就會增加。
第三，指數目前嘅跌幅雖然比早幾日減少咗，但熊證至今仍然未能追到恒指現價水平；當然總會有一日追到啦，但喺依家大市對烏俄局勢咁敏反嘅環境嚟講，真係隨時嗰邊再嚟多個導彈，唔止爆民居，仲炸埋股市。喺指數仍然靠近牛證街貨嘅情況之下，用住淡倉住先啦。
依家10點21分，喺五分鐘圖上見到恒指跌幅慢慢收窄，還好可以等Slow STC(14,3)上返去超買水平後，出隻恒指熊(65271)，收回價23457點，同現價有逾800點差距，其實已經係市場上最貼價嘅熊證堆中，槓桿第二高，因為槓桿最高嗰隻有逾20%街貨，可避則避，吼五分鐘圖Slow STC(14,3)兩線上到超買時小注出場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
