2022年2月24日
天氣開始有回暖嘅情況，不過朝早同夜晚都仲feel到好鬼寒，同個市一樣，今朝完U之後又吹咗陣冷風出嚟，隔晚美股跌400幾點，恒指今朝早再跌多300幾點，指數已經落到去23200點呢啲位左右，先將第一層牛證嘅街貨全數收回，呢度有相當427期指。日線圖上見指數乜嘢走勢都已經破壞晒，就算呢期業績期，個別藍籌股業績造好，但都無力勉救勢弱嘅恒指。
到正式開市之後，恒指不負所托繼續下行，但你見到指數下行個勢並非咁強，唔係一開市就好似「1分鐘超市任拎比賽」咁衝呀！殺呀！反而有種施施然、悠悠閒嘅感覺；「咁好死比時間啲貼價牛走人？」未必嘅，可能呢種姿柔淡定嘅走勢，隨時令貼價牛放低一份戒心都未定，反正依家最貼價嘅23200至23299點眼見有900幾張期指街貨，但有部份都應該完U時都死埋，有部份開市後都走人，不過唔忿氣嘅咪退後兩步再嚟多次牛證，唔信你唔升。
依家9點57分，恒指果然見到跌幅收窄，今朝喺作戰室出動10分鐘圖睇市，事關今朝開出「錘頭」之後指數就上，打算出好倉以「錘頭」確認轉勢兼博指數低開高走啦；忽然戰友出嚟提醒：俄烏今早會有大型軍事行動。真係救命，呢啲市真心仲難搞過我家肥貓。
指數難搞唯有向個股埋手，一陣中午收市後就輪到港交所(00388)公布業績，其實港交所嘅生意狀況真係好鬼透明，每日你都知佢成交額，每個月又有份報告upload上佢網站，近年港交所都有啲數字係創新高，例如日均成交金額、ETF同債券成交額等，所以唔難估計港交所今年份業績又有data創新高，問題係佢創個新高，同你心目中嘅新高，差距有幾大啫。
不過，真心港交所日線圖走勢的確肉酸，本以為噚日喺416元呢個位似有企定，但都唔得，今日再嚟多個裂口下行，那怕Slow STC(14,3)兩線已經進入嚴重超賣水平，目前整條保歷加通道已經呈下，靠彈都真係唯有靠份有驚喜嘅業績沖一沖喜，否則，港交熊(64066)，收回價438元，市場上最貼價熊證，所以槓桿都係最高，有約11.05倍，同現價有約7.09%距離，小注出動摻佢一腳算啦，
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
