2022年2月22日

【盤房來料】短期要重返23500 否則下試去年低位

俄烏局勢升溫，俄羅斯宣布承認烏東兩個地區為獨立國家，歐美聲言將制裁俄羅斯。隔晚美股假期，但喺地緣局勢緊張加劇下，道指期貨急跌，拖累港股裂口低開。恒指裂口低開477點，開市已失守50天線(23920)，其後跌幅一度收窄至356點，見23813半日高位。可惜大市沽壓再現，跌勢加劇下，半日恒指最多跌833點，見23336半日低位，創1月7日以嚟新低。中午恒指跌幅略為收窄，報23456，跌713點；國指中午報8212，跌243點；恒科指插水3%，跌161點，報5165。

藍籌股除咗三桶油受油價造好帶動外，其他成份股普遍下跌。大笨象(00005)中午公布業績前，半日跌2.4%，中午業績公布後，回購未見大力加碼，派息亦未令市場滿意，午後跌幅擴大。恒生(00011)同樣喺中午派季度成績表，業績令人失望，下半場跌幅當然擴大。其他金融股亦見下跌，友邦(01299)跟平保(02318)呢兩隻龍頭保險股，齊齊跌逾4%。

重磅科技股全線低走，恒科指再創新低，指數成份股只有ASM上升，其餘股份全部要跌，被踢出成份股嘅微盟(02013)半日再跌8.4%，科指成份股中表現最差，已連跌三日，走勢弱過藥煲，咪多手接飛刀，博反彈，緊記跌得多唔係一個買貨嘅理由。ATMX無人倖免，全部半日跌逾2%，當中美團(03690)再創超過20個月低位，半日再跌6%。

除咗科網股走勢弱之外，燃氣股今日跌幅亦較為顯著，其中天倫燃氣(01600)配股抽水，裂口低開大跌27%，半日跌兩成半，拖累其他燃氣股急跌，閒閒地都要跌超過4%，新奧燃氣(02688)半日跌一成，為表現最差藍籌股。

港股暫時受外圍利淡因素及避險情緒影響，走勢急轉直下，氣氛再度轉弱，恒指更失守多條移動平均線，以及23500重要支持，如果呢兩日無法收復失地，重返23500水平之上，隨時再展開新一輪跌浪，下試去年低位22600至22700。若然能重返23500水平靠穩，則仍可視為區間上落，但區間下移至23500至24800。

麥狄文
(徐狄怡‧證監會持牌人)