2022年2月17日

【輪證贏家】恒指Call借業績期打上25000點

自從我家多咗隻肥貓之後，屋企嘅生氣度提高，平均年齡亦大幅下降，但時間、金錢、體力(瘋狂掃貓毛)都虛耗唔少，無所謂，都一早預咗架啦，難得你喺呢個屋企入住第200日，今晚又可以有借口同你開啲貴啲零食賀一賀佢...就開大舅父之前買比你嘅原條魚魚零食啦！

今朝恒指開市微升3點，經過接近半個鐘嘅上上落落之後，指數由升轉跌再變返升22點，做緊24755點，不過喺作戰室度其實噚日臨收市前見五分鐘圖Slow STC(14,3)上到超買位所以小注淡倉落場，博今日Slow STC(14,3)向下回落而走人。結果指數喺開市後頭嗰半個鐘已經兩度下試保歷加通道中軸，但最終失敗收場，兩次都唔穿淡倉真係點都要走咗先，話口未完，指數就上破咗24800點呢個位，將第一層熊證街貨24700至24799點嗰121張期指全數收回。

都啱嘅，恒指以噚日收市價計都踩住熊證街貨，就算今日有新牛證街貨層上市，但裡面相對期指張數嘅街貨都比較少，在取易不取難嘅大前題下，出淡倉捉第一下高開低走失敗後，唯有反手順勢而行。

睇返日線圖，之前見嘅三線滙聚位開始散散地，原因係，10天線走勢緩緩向上，即使20天線同100天線都係用同一堆恒指收市價嚟計，但因為日數較長嘅關係，往往都係要慢半拍先見到轉向。所以今日見到恒指踩住10天線再上，而150天線仍然做緊阻力位。噚日都有提過恒指隨時喺150天線&三線匯聚位行個「三角形」出嚟，嚟到今日似乎係150天線同10天線迫指數行個「三角形」出嚟，而150天線咁啱又同25000點好近，但望望月曆，其實港股已經開始進入業績期，下個星期開始進入高峰期添，唔知恒指會唔會借藍籌業績靚仔，借力推高篤穿25000點仲企穩喺上面呢？

恒指Call(22965)，行使價25000點，同現價只有1.11%價外距離，8月底到期唔怕時間值，低引伸，槓桿吸引，肥貓啲罐罐靠你啦！

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。