2022年2月11日
噚日出咗隻恒指牛(50606)，以為噚日下半場死梗，點幾鐘個時指數有開始再向下行嘅情況，已經打定輸數搵位拿拿聲掉走隻牛，所以都set定以五分鐘圖嘅100分鐘線(五分鐘圖20線)作位止蝕水平。誰不知指數喺1點至2點呢段時間踩住條100分鐘線企穩之後，由2點到下半場完場前都悶住嚟升，雖然行得好慢，但還好方向正確。(50606)捱過1點至2點呢段時間之後，其實喺2點至4點呢兩個鐘頭內任何一個位收工都有進賬，就係呢兩個鐘(50606)高低位做過.045元/0.034元計，平均賣出價為0.0395元，對比噚日朝早嘅平均買入價0.0285元計，平均賺幅有近38.6%。「嘩！咁多嘅！」係呀，因為本身隻(50606)嘅槓桿高嘛。
新一波疫情似乎未見有明顯回落嘅情況，噚日見到有提倡話封城，甚至禁足一周，面對住開始有更多同更唔明朗嘅「措施」之下，先係我老媽叫我儲定糧(其實夠食舟可以)，繼且擔心嘅係我家肥貓貓砂唔夠用，自己糧未買就率先買定肥貓嘅所需，忠心貓奴吧。
依家10點33分，今日真係比較難落注，事關恒指日線圖上見150天線頂得咁行，又25000點彷彿仲未搵到強力支持，呢個走勢開淡倉都真係合情合理；之但係指數現水平其實仍然都係近上方重熊街貨，兩難之下喺作戰室都真係搞到成10點先至決定到第一注：淡倉。又咁講，睇清事實先至行動一定係比胡亂落注更佳。
依家10點37分，恒指五分鐘圖上見指數踩得住250分鐘線(五分鐘圖50線)同500分鐘線(五分鐘圖100線)呈上，作勢行出「圓底」走勢。咁樣啦，「圓底」頸線上破唔到嘅話，恒指熊(52917)，收回價25300點，同現價有逾460點差距，槓桿約有38倍，都真係夠DT用；反之，恒指牛(50965)，收回價24400點，同現價有逾430點差距，槓桿有約57倍仲好Trade。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
