2022年2月9日

【輪證贏家】恒指熊快博指數高開低走

噚日揀咗隻恒指熊(62930)出嚟，不過都知道永遠都係喺作戰室嘅動作比【輪證贏家】嘅動作快好多，所以喺作戰室嘅戰友噚日注淡倉由開市無耐落場之後食到上半場臨收市前收工；而睇呢度而落場都等到11點幾先至有位出到場，但可惜當時指數已經向下落咗唔少，再喺下半場開市之後指數有跌完回升嘅走勢，喺1點45分更見指數喺五分鐘圖上破100分鐘線(五分鐘圖20線)，發出止蝕訊號，以(62930)喺1點45分至1點50分高低位做過0.088元/0.085元，平均走佬價為0.0856元，對比朝早嘅平均買入價0.085元，平均賺幅只得1.76%，真係用嚟補貼手續費架咋。

今朝我家肥貓無匿埋喺佢個私人瞓覺窩，反而喺梳化度監視住我同我家老爺兩個開工。正當佢喺我個Keyboard上面橫過嘅時侯，恒指完U開報升逾300點，將指數由本來近牛證街貨打反向上，仲殺埋第一層熊證街貨，再感恩記得前人教落嘅止蝕比止賺更為重要嘅呢句說話，就算恒指開市會都見高開低走，呢開市呢個上升裂口都未必隻隻熊證受得住。

依家9點43分，可能係肥貓怕咗我嘅打字聲，所以匿返入去佢個暖暖窩瞓覺。恒指升勢似乎唔錯，去到依家仲上破埋24800點，即係將熊證首兩層街貨全數打靶，呢度有相當於843張期指。睇落就未夠喉嘅，不過嚟到呢度，喺五分鐘圖見Slow STC(14,3)追到上嚟嚴重超買，算是同指數一齊都企返喺個高位，出淡倉博指數高開低走亦係無可厚非。

恒指熊(53046)，收回價25100點，企得遠過重貨熊先，槓桿有約27倍，Day Trade嚟講算係唔錯，而且(53046)仲係喺同一收回熊證堆中槓桿最高，趁依家恒指五分鐘圖見Slow STC(14,3)上到超買水平落場的話，希望仲趕得切啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。