2022年1月28日
噚日揀咗隻恒指熊(55102)，喺朝早見恒指五分鐘圖再次跌返50分鐘線(五分鐘圖10線)入就趁機入市，仲set定個指數位出自己，就係都係以番五分鐘圖指數上破保歷加通道中軸的話就走人。最終指數喺噚日3點5分上破呢個位之後企穩再上，於是將隻(55102)掉走，以3點5分至15分呢10分鐘時間內走隻(55102)的話，按當時高低做過0.104元/0.095元，平均沽貨價為0.0995元，對比朝早嘅平均買入價0.0905元，呢趟嘅平均賺幅為9.94%，唔算太多，無計，中途先入隻熊仔，呢鋪只可以話係貴買貴賣完咗件事啫。
噚日收市之後即時奪門而出，因為每年嘅新年我都會上我舊老細(仲做緊雜誌嗰時嘅老闆)屋企拜年，但啱啱佢屋企先有白事發生，所以改變策略，飲杯嘢就算。兩個人一傾就傾咗兩個幾鐘，成年儲落嚟嘅對話其實兩個鐘都真係傾唔完，數數手指兩人都識咗15年，其實我同佢喺公司重疊嘅時間唔算好耐，一年都無，隨時只得大半年，但唔係佢當日有份請我、唔係佢當日有份教我，我都未必會學有所成，甚至有今日。由老師變成老友，你要好好重仲身體。
噚日恒指開市先跌300幾點，之後愈碌愈有，指數一度跌逾700幾點，首五層牛證街貨被指數「動態清零」，一隻不留。而去到噚日尾市時指數跌幅大為收窄，催迫到五分鐘條Slow STC(14,3)上到嚴重超買水平。本以為今朝恒指繼續「圍封」啲貼價重牛，誰不知今日開市微升11點，𢲷爆頭都諗唔明。到正式開市之後，見到恒指由升即轉跌，依家9點34分，指數倒跌118點，做緊23688點，哦...都係慢幾拍嘅，喺五分鐘圖見Slow STC(14,3)兩線確認高位回落，所以都喺作戰室度話可以再出淡倉(其實噚日都有叫過夜注出淡倉)，都係用返Slow STC(14,3)做Swing Trade啫。
依家9點40分，喺五分鐘圖上見到指數依家企咗喺保歷加通道中軸橫行，得Slow STC(14,3)一個向下落返去超賣水平，唔通走勢失心瘋又變？咁又真係好難跟得切喎，不過，以目前恒指擺位同牛熊證街貨圖睇，指數近下方牛證而又貼牛儲得好鬼多貨喺度，恒指熊(54575)，收回價24600點，同現價有約780點差距，保持一定距離就安全啲嘅，依家9點54分，指數喺五分鐘圖上終於失守保歷加通道中軸再向下運行，基本上呢啲位作戰室嘅戰友一早披熊上陣，又係迫巴士嘅時間啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
