2022年1月25日
噚日揀咗隻恒指Put(13090)，以小時圖失20小時線(小時圖20線)為入市位，講緊嘅就係最後嗰一個鐘，小時圖粒燭真係失20小時線，就按(13090)最後一小時嘅高低位0.127元/0.126元計，即平均買入價為0.1265元。
至於隻滙控(00005)就有啲濕滯啦，噚日朝早10點鐘左右見沽走隻(22014)，鎖定利潤，再換隻(22160)，但之後見到滙控個價有向上回升，所以都set定以小時圖上破20小時線為止蝕位。不過，全日計滙控都無上過呢個位，唯有硬住頭皮過夜。
手揸兩隻淡倉過夜都咪話唔驚，下個星期就放假嘛，更係想喺假期前可以食晒啲貨先啦。噚晚見到美股係咁冧，臨瞓前再睇見到美股跌成800幾點，心諗以為今日無死啦，誰不知起身之後睇電視，「料咩呀？倒升99點？」千句萬句粗口之後，去到9點20分，恒指完U跌404點，指數落返去24251點，踩返落去牛證第一層街貨，而呢層有成過千張期指喺度，認真，都貪心喺作戰室度話出淡倉追埋指數全殺24200至24299點嘅牛證。依家9點37分，恒指跌幅有所收窄，依家做緊24267點，跌388點。
滙控開淡倉一早set咗以日線圖嘅20天線為目標，依家繼續向下落緊去，其實不論係中途走咗貨還是仲揸到依家，隻(22160)(或者你哋手上其他淡倉)都仲可以繼續揸住，甚至再嚟多Round都仲得，都係嗰句：股價落緊去目標而目前同目標都仲有一段距離。
至於隻(13090)，依家9點47分，恒指一如預期般向下殺晒24200至24299點嘅牛證街貨，呢度有相當於1320張期指，再向下望落去，其實街貨量都唔少。而換上日線圖則見到，本身噚日喺電台話失咗100天線都唔緊要，反正下方仲有條10天線支持住，但今日連嗰條10天線都唔見埋，都其實唔緊要，仲有50天線同20天線，而又呢兩條線嘅距離咁啱又咁近喎，隨時做出雙線支持都唔奇。咁隻(13090)就大膽啲，下望呢兩條線做目標先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/作戰室？Click呢度就得：https://www.patreon.com/cbbcwar
FB：https://www.facebook.com/cbbcwar
