2022年1月19日
噚日我諗最震驚港人嘅新聞，都莫過於要撲殺2000隻倉鼠及細小動物(包括龍貓同兔仔)，2000條生命就咁樣因為幾隻驗到有COVID-19嘅病毒而成批「人道」不得停，仲要講明喺上年12月22日買咗倉鼠嘅，麻煩主人「上繳」埋你嘅毛孩出嚟比佢哋「人道」；最吊詭嘅係，如果你「上繳」嘅鼠鼠係驗到有COVID-19的話，咁主人要做強檢，換言之即係佢哋會幫隻鼠鼠做檢測(唔檢又點知有無病)，但檢過無病嘅都要「人道」？咁做真係「人道」？
今朝起身睇新聞見噚晚美股跌逾500點收市，本以為今朝恒指都會跟，不過完U後見到指數升100幾點，再上24200點樓上，所以噚日隻恒指Put(24516)睇嚟都要好似鼠鼠一樣，搵咗個地方走人先。依家9點46分，見指數喺五分鐘圖上暫時都仲Keep住今朝開市嘅位置，so far出咗三支燭，但每支燭嘅低位都比前一個高，隨時un un下被條500分鐘線(五分鐘圖100線)做咗支持都唔定 ；換個小時圖則見指數暫時最高位做過24239點，同20小時線(小時圖20線，24240點)算是重疊(爭1點咁大把)，就以呢個位為(24516)嘅止蝕位，一旦上破，走貨無懸念。
至於滙控(00005)方面，噚日都出咗隻滙豐Put(22014)，係基於呢隻嘢都升咗唔知N咁多日所以博佢高位回落，以日線圖玩嘅話隨時都要煲幾日，依家9點44分，滙控股價暫時見逆市下行，但下行嘅幅度唔算好高，暫時只係跌0.25元/0.46%，日線圖上仍然見到Slow STC(14,3)%K線低走於%D線，Keep住咁樣就啱架啦！
再望返恒指，開始見指數高開完就低走中，頭先mark住小時圖20小時線個位都仲未破，怕且有機會可以等得返五分鐘圖條Slow STC(14,3)落到超賣先至走人，但仍然Mark住「上破小時圖20小時線」為止蝕位啦。
另外呢兩晚都有喺電台節目上講隻冷門嘢，就係華潤置地(01109)，見今朝華地都有3%升幅，而今朝發現有聽眾inbox我話佢星期一晚聽完之後星期二追入，所以問我跟住個target set喺邊好，好簡單，因為買入原因係以日線圖10天線有支持而入貨嘛，咁掉返轉失10天線咪走囉；再簡單啲，夠咪收工囉，反正佢本身日線條Slow STC(14,3)都唔係屬於低位嘅。
今日都係唔搞咁多嘢住，專心處理埋(24516)同(22014)先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
