2022年1月11日
噚日揀咗隻恒指牛(67002)出嚟，喺下半場開市無幾耐見五分鐘圖Slow STC(14,3)落到超賣位就摺入去，誰不知之後去到3點前，恒指躺平橫行，但去到3點鐘，指數終於都起身，最大嘅幫手應該又係港交所(00388)，尾市真係愈上愈有，指數仲創埋噚日Day high，以3點10分至收市時Slow STC(14,3)都keep住喺80以上嘅超買水平位而走隻(67002)的話，按當時高低位做過0.066元/0.053元計，平均沽貨價為0.0595元，對比噚日平均買入價0.0495元，剛好平均賺10格或20.2%。
噚日第N次覆診，醫生話我嘅甲狀腺指數有明顯嘅大幅回落，同正常水平範圍上限只係爭零點幾，可以減藥但18個月嘅食藥療程就唔可以斷，革命尚未成功，我仍需努力。希望大家都健康，有健康嘅身體先有氣有力去炒嘛！
噚日其實見到恒指五分鐘圖上Slow STC(14,3)上到超買水平時好想出淡倉，無奈呢期恒指唔知食咗乜，連升三日升到無朋友咁款。不過，恒指今日開市跌68點之後，至依家9點35分，指數已經再向下落多幾十點，但好快都已經縮返上去，即市開淡倉再追指數向下的話，唯有靠條250分鐘線(五分鐘圖50線)生生性性做阻力，唔貪心先推返條Slow STC(14,3)落去超賣位就心滿意足；當然，格仔黨另一個玩法就係見好即收啦。
睇埋恒指日線圖，見到指數今日暫時雖然下行，但擺位上仍然靠近保歷加通道頂線，唯比較在意嘅係，保歷加通道口有收窄嘅情況，即係話大市嘅波幅將會受到保歷加通道收窄而有所限制，喺波幅咁細嘅情況之下，似乎牛熊證比窩輪更易處理。
依家9點53分，喺恒指完U之後喺聊天室都已經講定開市市後出淡倉，至依家指數仍然見紅，但係點數上並唔係大幅下行嗰種，而係有一種比淡友嘅感覺係「你急我唔急」，的確，恒指目前擺位仍然靠近上方熊證，出淡倉都真係偷位落注，見好即收，就好似依家9點58分時喺五分鐘圖見到Slow STC(14,3)兩線落到超賣至嚴重超賣水平，聊天室今朝第一注嘅淡倉基本上都可以收網。
反過來見到Slow STC(14,3)出現觸底(但未超買)，可以考慮開返好倉，恒指牛(68048)，收回價23248點，同現價有逾400點差距，但已經係市場上第四貼價嘅牛證，約51倍槓桿，有其他再高槓桿嘅不過街貨都同樣地高，(68048)街貨比較少。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
