2021年12月31日
今日係2021年最後一日，亦係最後一個交易日，悶咗兩三日等過年之際，又點會估到恒指喺最後一日開市升逾400點，上到23500點樓上，先將熊證首三層街貨全部殺清，呢度夾埋已經有相當於1408張期指。當然喺23600至23699點嗰1285張期指最為吸晴，不過，依家9點37分見指數暫呈高開低走嘅走勢，但實在指數目前擺位咁近上方重熊，如果有心係結算日之後先嚟殺新一輪期指嘅話，咁23600至23699點呢層隨時凍過水。
換個日線圖睇，其實今日恒指大裂口向上爆升後，已經重上20天線以上水平，Slow STC(14,3)兩線亦見到回升嘅走勢。
睇返恒指五分鐘圖，依家10點2分，指數仍然Keep住喺高位橫行，50分鐘線(五分鐘圖10線)真係有排都未到，不過見到保歷加通道口繼續拓闊，似乎真係等埋條5分鐘線嚟到先到再踩住再去殺重熊咁款。同步見到Slow STC(14,3)兩線處於嚴重超買水平開始見橫行情況，暗示會出超買再超買嘅走勢。
進取啲想快手Trade埋今日的話，恒指牛(64571)，收回價23158點，同現價有逾370點差距，有逾57倍槓桿真係只適合Day Trade用。當然，如果一心諗住觀戰，甚至已經收咗爐嘅話，就明年見！
今日半日市，【輪證下半Part】暫停一日。
祝大家新年快樂！2022年繼續贏多啲！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
