2021年12月30日
今日係12月30號，亦即係今年最後一個有齊上下半場嘅全日交易日，聽日(31日)除夕只係得半日市，呢個星期港股都怕且成交過唔到1000億，但誓估唔到噚日恒指無啦啦向下跌200幾點，最低見過23008點，本以為佢唔想攬住23000點過年，但尾市又見跌縮收窄，今朝早又開升43點，到依家9點39分指數跌過又升返，不過講緊都只係幾十點嘅事。到依家9點43分，升幅再次擴大咗，喺五分鐘圖上見到保歷加通道口乘噚日拓闊之勢比位指數再上，激氣！原本喺噚日見到Slow STC(14,3)兩線上到90以上嘅嚴重超買位，出淡倉過夜博今日Slow STC(14,3)同指數都一齊回，係有回過呀，之後喺五分鐘圖上見一踩50分鐘線(五分鐘圖10線)之後就即彈呢。
嚟到10點7分，恒指已經升幅擴大至過百點，做返上23200點，呢口價放喺牛熊證街貨圖上嘅話，由噚日近牛變成依家近熊，只可惜近牛熊兩邊嘅街貨量其實都唔算多，再加上近日成交縮減， 大巴大巴向上/下殺嘅情況估計呢一兩日都唔會出現，真係休養生息好過。
望望月曆，其實過咗1月1號個新年之後，一個月之後就到農曆新年，很老土的一年之計在於春，不過事實又是如此。往往每年呢啲時間除咗回顧過去之外，更重要嘅係展望將來，《虎年美股港股之牛熊對決》網上講座已經接受報名，更係唔止得我一個咁悶場啦，詳情可以去我FB睇睇，重點係免費嘅！點呀？啱唔啱呀？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
