2021年12月21日
噚日喺上半場入咗隻隻恒指熊(59979)，懶理到下半場先至進行收割，事關整個上半場指數都係受制於50分鐘線(五分鐘圖10線)之內，係去到下半場大約1點15分，指數無啦啦上破咗100分鐘線(五分鐘圖20線)，如果以呢個時間走隻(59979)的話，以當時高低位0.055元/0.051元計，平均沽貨價為0.053元，對比噚日嘅平均買入價0.0455元計，平均賺幅為16.48%， DT嚟講都已經係一個唔錯嘅成績。
噚晚同班舊同事食飯，落好鬼大雨，正正式式Feel到「天氣冷得可怕，天正下著雪」(國語)，而今日又係冬至，即係全年裡面日照最短嘅一日，之後每一日嘅日照就會開始慢慢多返，直至夏至為止。
噚日冷風襲恒指，但今日似乎暖和返少少，恒指今朝開市微升後，至依家9點38分指數升幅略為擴大，升緊125點，做緊22870點。其實喺恒指牛熊證街貨圖上見到第二層牛證街貨22500至22599點呢度已經儲咗過2000張期指，而以噚日恒指收市價計，點計都係近下方牛證街貨，唔通今日指數齋戒唔殺生？
喺小時圖上，指數的確有觸底反彈嘅走勢，Slow STC(14,3)兩線處於嚴重超賣水平今朝見%K線上破%D線，同步指數今朝輕微高開後繼續向上，DT嘅話的確可以小注嘗試出好倉以博指數上返去10小時線(小時圖10線)。
至於日線圖方面，暫時見到今日出到「身懷六甲」嘅形態，都係一個轉勢形態，不過依家只係開咗市17分鐘，最終會唔會出到「身懷六甲」都仲未知之數；更何況肥牛嘅威都真係不容忽視。
恒指Call(17016)，行使價23400點。同現價有約2.3%價外，為市場上第二貼價價外Call之中，引伸最低、槓桿最高，出年6月底先到期，博埋今日確認到「身懷六甲」都仲得。進取嘅以恒指五分鐘圖見50分鐘線(五分圖10線)有支持進場；安全嘅當然用返條Slow STC(14,3)落到超賣位先入場啦。
祝大家冬至快樂！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入Patreon/聊天室？Click呢度就得：https://www.patreon.com/cbbcwar
FB：https://www.facebook.com/cbbcwar
