2021年12月20日

【輪證贏家】恒指熊博聖誕大餐食肥牛

其實都已經12月中啦，都真係呢一兩日先開始覺得天氣有啲凍，似返冬天，今晚約咗班舊同事食飯，啲冬天褸終於可以出動。

冷風今日似乎都吹到個市，開市見恒指跌112點，完U先23079點之後，第一層牛證23100至23199點嘅街貨全死，呢度有相當於718張期指。再向下望落去，牛證由23000至23099點開始，數到22700至22799點呢四層，每層都有過千張期指街貨喺度，真係咁易放過堆重貨牛？還是12月得返兩個星期死都要Window dressing？咁就要問下中環嗰班喺聖誕節前要唔要食四層每層有過千張期指嘅牛扒大餐啦。

依家9點50分，恒指正式開咗市20分鐘，見指數一時跌幅擴大，一時跌幅收窄，暫時低位做過23010點，即係話第一層牛證街貨仲爭10點先叫做完全死亡，真係咁好人爭少少都唔殺？還是留返10點好等資金認為再下面嗰堆牛有希望，加碼進住，將佢變得再肥啲先至殺？

換個小時圖出嚟睇睇，的確見到小時圖上嘅Slow STC(14,3)兩線落到超賣水平，今朝見有觸底嘅情況，咁嘅走勢的話係有回升之象；再望望日線圖，都見到Slow STC(14,3)兩線處於超賣範圍，不過兩線走勢仍然向下，未有觸底嘅情況，比較麻煩嘅係保歷加通道口有輕微拓闊嘅情況。

恒指熊(59979)，收回23441點，同現價有紉340點收回距離，所以只限今日做Day Trade，咁貼價當然槓桿唔細，有成46.95倍。依家見恒指五分鐘圖，指數低開後向上行至接近50分鐘線(五分鐘圖10線)，但都未掂到就出「十字星」後向下，依家咁啱生成「圓頂」咁款再穿咗少少頸線，當然希望指數可以彈返高少少，如上返50分鐘線但又見阻力喎，咁就係落場嘅perfect time啦！

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar