2021年12月15日
喺聯儲局議息前，市場普遍抱觀望態度，不過隔晚公布嘅11月生產物價指數(PPI)增幅創下11年來新高，顯示通脹壓力高企，市場關注聯儲局會否放鷹，加快及加大減少買債步伐。因為美股都放軟手腳，缸邊友對於港股就更加保守，港股兩邊拉鋸，喺23700上下爭持，高低波幅不足200點。
恒指低開22點，報23658，一度倒跌69點，見23566半日低位，不過23500水平又見買盤承接，大市止跌回升，最多倒升109點，見23745半日高位，可惜10天線(23841點)前行人止步，10天線由支持變阻力。半日恒指收23684，升48點；國企指數報收8411，跌7點；恒科指跌31點，報5853。
藍籌股個別發展，通脹壓力下，聯儲局或加快收水步代，金融股造好，友邦(01299)跟平保(02318)分別升0.4%及0.6%。ATMX今日只有阿里(09988)爆冷升3.4%，美團(03690)、騰訊(00700)、小米(01810)分別跌1.1%，0.2%及1.2%，小米創咗16個月低位。體品股威咗一日，今日又失去光彩，安踏(02020)半日跌3.4%，藍籌之中表現最差。
至於電力股及相關股份，今日落鑊，內地首11個月發電量升9.2%，帶挈一眾電力股抽高，華潤電力(00836)創近十四年高位，半日大升7.4%；其他電力股以火電股升勢較強勁。新能源股其實有條件追落後，阿Man都係鍾情龍頭股龍源電力(00916)，雖然半日升1.1%，表現平平，但調整完成漸入佳境，企得穩18元，有條件挑戰前高位。
生科股繼續跑輸大市，呢期資金唔炒呢個板塊，連龍頭藥明生物(02269)失咗紅底股身份後，幾日都未收復失地，今日再失95就加快跌勢，留意盤中會否向下考驗90元較大支持位，順手殺埋個牛證重貨區。康希諾(06185)稱其生產的新冠疫苗能有效防禦Omicron變異株，中午大升一成，生科股中一枝獨秀。
麥狄文
(徐狄怡‧證監會持牌人)
