2021年12月14日
噚日下晝睇恒指日線圖，見指數受制於20天線，不過，當時見指數同熊證街貨距離又好鬼近，本來想開淡倉博指數受制於日線圖20天線，但結果都係無咁做，廢事街貨VS技術分析時整個出人意表嘅結果出嚟。但隨住時間嘅過去，見到指數愈跌愈有，仲轉埋燈，24000點得而復失，真係好想入淡倉博一博；不過又咁講，五分鐘圖上見Slow STC(14,3)幾乎全個下午都處於超超水平，咁嘅環境又邊搵到位入隻淡倉呢。
誰不知今朝恒指開市就向下跌260點，開市報23693點，首三層牛證街貨全數死亡，當中包括近現價又最多新增嘅23700至27399點嗰800幾張期指，而呢度夾埋有相當於1272張期指，如果阿市係唔貪心嘅話，隨時殺完呢一轉又橫行到4點。
依家9點49分，恒指暫時維持於200幾點嘅跌幅，所以又開始向個股捏手，剛剛與著啱啱，見到中移(00941)開市後股價逆市衝高，去到9點45分時見中移五分鐘圖Slow STC(14,3)兩線上到嚴重超買水平，而喺走勢圖上則見出現咗條比較長嘅上影線，於是快手執隻中移熊再喺聊天室上同大家開心share，有時day trade就係要咁快，捉得到彷如有人開咗度門之後你夠時間可以閃身跟尾入去，會為自己「好身手」而暗爽一番；捉唔到都唔會死嘅，自己開門啫，好過被度門撞到先啦。
嚟到10點12分，其實恒指喺五分鐘圖上見開始行咗個「長方形」出嚟，不過，50分鐘線(五分鐘圖10線)經過半個鐘有多嘅長征，終於都行到去恒指附近。純以街貨圖嚟講嘅話，指數再次靠近返牛證街貨，同熊證第一層24300至24399點有600點差距，點睇都似向下再殺。至於日線圖方面，指數受制於20天線後向下落到連10天線都失守埋，Slow STC(14,3)兩線再次見到掉頭向下嘅初形，怕且開淡倉勝算唔低，問題係有無位入啫。
望望月曆，今日係12月14日，即係仲有大約半個月到就到2022年，揀輪嘅時侯留意返咪以為2022年到期嘅輪好似好遠咁，數數手指如果要揀到有三個月嘅中期輪，起標計講緊係出年3月中打後嘅日子，所以往往喺年尾嘅時候都有一種錯覺，就係出年到期嘅輪好似好長期嘅事咁。
恒指Put(27415)，行使價23000點，為市場上貼價價外Put之中，於出年3月中打後先至期，低引伸、槓桿吸引，又試試吼五分鐘圖Slow STC(14,3)上返去超買位時落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
