2021年12月9日

【輪證贏家】恒指牛出動殺肥熊

呢兩日喺FB睇到有條新聞話有個港人助養唔知邊度嘅兒童，好奇之下喺IG搵個細路出嚟，見到受助兒童食煙飲酒揸靚車開Party，懷疑受騙。其實早喺幾年前我都有試過每月捐款助養兒童，每年都會如常地收到佢哋寄嚟嘅成長日誌或者係一啲心意卡，但往往都係由另一個「義工」去幫手寫信，頭一兩年我都有好努力同用心去回覆，希望對方收到，但其後我都只係搵我班同事去「處理」，到最後有同事發現佢寄嚟嘅相有重複，喺懷疑被騙嘅大前題之下成班同事勸我「算吧啦」，仲叫我助養佢哋好過(哈哈)。

噚日恒指下半場又唔係想像中咁悶局喎，至少五分鐘圖上指數喺保歷加通道嘅走勢，同Slow STC(14,3)都可以做到兩至三轉swing trade，最後，臨收市前10分鐘見Slow STC(14,3)落到超賣兼有觸底回升嘅情況，同時指數都有500分鐘線(五分鐘圖100線)做咗支持，所以膽粗粗喺聊天室度話可以小注出好倉過夜。還好今日恒指開升171點，到依家9點52分，指數升幅擴大至逾200點，最高暫時做過24296點。換言之恒指熊證首兩層全數陣亡，基本上24200至24299點呢層都可以當佢全死，400幾張期指咁又玩完，而喺五分鐘圖上見Slow STC(14,3)已經由噚日嘅超賣水平上到依家見超買，過夜好倉當然率先收割啦。

日線圖上見恒指噚日上破咗10天線之後企穩，到今日再彈，Slow STC(14,3)兩線仍然呈上，以目前恒指依家嘅擺位咁熊證街貨，而熊證街貨又唔係儲得少貨喎，再向上挑戰20天線都唔係無可能。

依家9點58分，恒指同Slow STC(14,3)喺五分鐘圖搶到咁高之後，就算再博指數上行殺熊證，都比條Slow STC(14,3)抖一抖氣先啦，所以喺呢個時候，動作快嘅聊天室戰友都棄牛入熊以博指數慢行返落最近嘅50分鐘線(五分鐘圖10線)，覓得支持後見再嚟好倉，貪心鬼就趁呢個位出淡倉爬格仔。安全等位入恒指好倉博殺上去的話，恒指牛(57145)，收回價23766點，同現價有逾460點差距，為市場上第二批最貼價牛證，槓桿有約48.46倍夠做DT，又既然係DT，11.94%街貨都可以暫且不理(更何況呢個街貨量都未算係好誇張多)，用呢隻貼價牛吼五分鐘圖見Slow STC(14,3)回返落去超賣位時先至出動。

指數未見有太大異樣時，又八掛下啲個股。還記得星期二(12月7日)電台錄音時提到隻友邦(01299)，呢兩日見到友邦都造得唔差，有聽到而跟咗嘅應該都唔需要太擔心。不過，連升兩日之後今日見股價愈嚟愈近條20天線，Slow STC(14,3)兩線勢頭呈上，再追佢好倉怕且都等等睇佢過唔過到20天線先再算。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入Patreon/聊天室？Click呢度就得：https://www.patreon.com/cbbcwar

FB：https://www.facebook.com/cbbcwar