2021年12月1日
專科醫生已經同我一早講過食甲亢藥有部分病人會出現敏感嘅情況，我噚晚就出咗，成身一撻撻仲以為又被嘢咬，但我家老爺同肥貓兩個都相安無事，只得我一個周身痕，今朝一早落去落下睇醫生，醫生話我係敏感出風癩，已經開咗止痕敏感藥比我，但依家都仲係好鬼痕，唉。
噚日碌連登時見到大家熟悉嘅麵神出post話今日個市一定會升，仲話如果唔升嘅話佢裸跑咁話。哈哈，可能個市唔想大家見到麵神裸跑，今朝完U之後見指數升120點，到依家就嚟10點鐘，指數已經升幅擴大至300點，不過見恒指牛證街貨第二層，即23000至23099點呢度有相當於2000張期指，真係咁筍一張都唔殺？還是個市又想再儲牛熊兩邊近街貨，到時先至再大開殺界？
今日係今年度最後一個月份嘅開始，其實按照慣例12月中開始就會進入平靜嘅時候，一來月尾就係聖誕同除夕日，假期比較多嘅時侯人就會掛住工作以外嘅事；二來24號同31號都只係得半日市，基本上都係靜局完場，就努力埋呢半個月先啦。
依家10點10分，指數喺23700至23800點高位徘徊中，如果開小時圖則見其實噚日指數漏底咗個「早晨之星」出嚟，今日裂口高開再上，基本上都係多得呢粒小時圖嘅「早晨之星」，先至迫令到五分鐘圖條Slow STC(14,3)出超買再超買。不過，嚟到依家指數喺小時圖上同保歷加通道中軸愈嚟愈近，而呢個位亦都係自11月18日裂口跌返落去保歷加下降通道之後，至今都未能上破嘅一個位置，所以依家等緊嘅就係指數會唔會喺小時圖上破得到呢個位，如果上破得到嘅話，好倉應該都會出動；反之淡食落場。只係需要留意嘅係小時圖上嘅保歷加通道口都有收窄嘅情況。
等到幾時？可能要11點打後先至有結果。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
