2021年11月24日

【輪證贏家】牛證愈儲愈多貨 恒指熊再搵位出動

開始接出年嘅工作，又係要做一件最難為我嘅事，就係要影張相比啲Partner，好等佢哋準備出年嘅promotion，真係，就連證件相都唔多張嘅我，確實係好少影相，連旅行嘅相都好少，所以...Partner，等等我。

今朝恒指開市升20點，喺聊天室裡面都出唔到啲咩策略，事關喺五分鐘圖上見指數目前仍然處於噚日至今嘅保歷加通道，不過，以恒指牛熊證街貨圖嚟講嘅話，其實都仍然傾向出淡倉殺近又重嘅牛證街貨，呢個行動其實早排已經展開緊，再睇今日恒指牛熊證街貨圖見到牛證24200至24299點係噚日已經mark住嘅過千張期指重貨區，但係今日見呢層雖然有部份街貨走佬，但望下啲就見到應該係走咗落去24200至24299點呢度，兩層過千張期指街貨牛，有無可能咁易放過佢哋呢？不過，我噚日喺聊天室度建議尾市時開好倉過夜。

「吓？咁咪同街貨圖相背馳囉？」都係架，不過重點係因尾市時見到Slow STC(14,3)落到超賣水平，所以出注好倉博今日Slow STC(14,3)會出到swing trade。依家已經9點55分，好沒趣地send咗張相問Partner得唔得(其實唔得我都唔知點算)，見到恒指依家升37點，五分鐘圖上條保歷加通道都無闊過，指數開市至今都係喺呢條通道裡面上上落落，我更加唔知點算。

終於Parnter收咁我張相，一天都光晒；不過喺10點4分時再睇返恒指，見到指數出現倒跌，同時喺五分鐘圖上見保歷加通道口有開始拓闊嘅情況，或者市太弱，出好倉博一下如噚日戰友所講：吊頸都要抖氣，但原來呢啖氣抖得咁短，所以聊天室嘅戰友已經反手做淡方向。

恒指熊(52784)，收回價25320點，同現價有逾600點差距，低街貨，槓桿吸引，吼返五分鐘圖Slow STC(14,3)上返去超買水平時先落場，目標仍然都係重貨牛。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

即市聊天室/Patreon：https://www.patreon.com/cbbcwar
FB：https://www.facebook.com/cbbcwar