2021年11月23日
明明咁重牛證街貨，捉咗熊仔都一段時間都仲未捉得到，噚日再嚟多次出恒指熊(52077)，今次進取啲，策略上係吼五分鐘圖恒指過唔到50分鐘線(五分鐘圖10線)或100分鐘線(五分鐘圖20線)就落場。以噚日喺Patreon出【輪證下半Part】嘅時間下晝1點34分計，其實都唔駛等好耐，喺1點45分至2點35分呢段期間，恒指五分鐘圖見到指數喺一直咬住100分鐘線(五分鐘圖20線)，而當中50分鐘線(五分鐘圖10線)都同指數扭得好纏綿，但最後指數都係敵唔過呢兩條線，呢個時侯就係出(52077)嘅時機，以當時(52077)高低位做過0.065元/0.057元計，平均買入價為0.061元。
其實，聊天室戰友們嘅入市位仲靚，因為我將入淡倉過夜時間拉到去接近收市嗰陣，睇返留言當時係下晝3點51分已經開始同戰友們一齊準備入淡倉過夜，而當時我當用返(52077)計數，高低位者只不過係0.057元/0.055元，即平均價為0.056元。可能你會話：爭4仙啫；四格就四格架啦，玩開嘅就明架啦。
到今朝恒指開市報24688點，跌262點，有貨過夜嘅戰友已經Yeah晒，呢口價放喺牛熊證街貨圖上嚟量度的話，首兩層牛證全數死亡，呢度夾埋有相當於1919張期指。恒指開市後其實首半個鐘都係開市價附近徘徊，本以為指數喺開市無耐會將24600至24699點嘅牛證全數殺晒，又未喎；唔通真係正如我噚晚喺電台所講分兩日去殺，最終目標係24400至24499點嘅第二個過千張期指街貨層？唔好理，今日10點未到有戰友報喜過夜熊食30格，我再望望恒指五分鐘圖，見Slow STC(14,3)目前兩線水平處於20以下，不過要見觸底反彈，貪心鬼睇下Slow STC(14,3)會唔會出到嚴重超賣先識停，到時就收割隻(52077)。
坦白講再睇返牛熊證街貨圖，如之前所指牛證24400至24499點仲有一層重貨喺度未殺，咩事阿市又會做善長仁翁先得架，恒指熊(52509)，收回價25306點，為市場上最貼價、最高槓桿嘅牛證，同現價有逾560點差距，吼恒指五分鐘圖見Slow STC(14,3)上返超買先落場。
依家10點13分，五分鐘圖開始見到Slow STC(14,3)出觸底反彈，(52077)都係走人先。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
