2021年11月9日

【輪證贏家】出恒指熊因牛證仍然重貨

噚日揀咗隻恒指熊(67294)出嚟，諗住吼恒指五分鐘圖Slow STC(14,3)上到超買水平先至出手。不過等咗成日都未見條Slow STC(14,3)上到超買水平，(67294)只能埋藏喺心底深深處。

通常喺臨收市前半個鐘都會喺聊天室上同戰友們預計第二日恒指牛熊證街貨圖會有啲乜同埋計定恒指處於咩位置，再加埋當時五分鐘圖條Slow STC(14,3)去到咩位，繼而再決定出乜嘢過夜，或者唔出貨過夜。而噚日就係推算可以出到好倉過夜，當然無信心就梗係唔博啦，而今朝恒指開市升189點，開市報24952點，雖然唔知聊天室裡面有幾多位戰友開好倉過夜，但就係見指數行出高開低走就好走隻過夜好倉，如果唔係，依家9點39分，指數升幅曾經收窄至不足100點，過夜好倉縮晒水。

依家9點42分，恒指繼續高開低走，依家升幅只有67點，做緊24813點，截時恒指今朝最高做過24956點計，指數將第一層熊證街貨24800至24899點全數殺晒，而將24900至24999點拆開以50點為一層的話，則24900至24949點嘅牛證都全部死亡，咁啱得咁橋，24900至24999點嗰34張期指，就全部都聚晒喺24900至24949點，換言之，25000至25099點可以作為熊證最貼價層。至於牛證方面，最貼價層為24600至24699點，計中間價的話就可以用(24699+25000)/2=24849.5點，依家9點50分，恒指做緊24819點，數值上近返牛證街貨，但講緊只係低於中間數30點，隨時兩個回合又彈返上去，不過呢啲中間位，係麻煩同難搞架啦。

去到10點3分，恒指喺五分鐘圖上見今朝行完高開低走之後，目前作勢企住條50分鐘線(五分鐘圖10線)再上過，走勢圖上則見指數喺50分鐘線上面行咗個「楔形」出嚟，「楔形」即係暗示指數處於待變格局。

恒指熊(67415)，收回價25300點，同現價有逾400點差距，約42.8倍槓桿都夠Day Trade用，出淡倉嘅原因係指數就算企喺牛熊街貨嘅中間，但由於牛證街貨比熊證嘅多，假設向上或向下行所需嘅成本都係一樣，咁點解唔向多街貨嘅方向埋手？

頭先診所打嚟話上個星期份驗血報告出咗，叫我約返醫生睇，都唔好咁晏費事太晏會多人，所以今日下晝嘅《輪證下半Part》可能會晏少少先至出到稿，請見諒。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

即市聊天室/Patreon：https://www.patreon.com/cbbcwar
FB：https://www.facebook.com/cbbcwar