2021年11月8日

【輪證贏家】恒指熊 博指數再殺重貨牛

上星期五(11月5日)出咗隻恒指Put(25874)，本以為連Day Trade都做唔到嘅時候，喺下2點5分至2點20分，五分鐘圖上Slow STC(14,3)落到去超賣水平，仲見過個位數嘅嚴重超賣，呢個時候可以走隻(25874)，以當時高低位做過0.16元/0.158元計，平均沽貨價為0.159元，對比平均買入價0.1545元，少少地執2.91%。

不過，如果打算係長揸嘅話，莫講話揸到今日啦，上個星期五2點45分至3點40分呢段期間有無諗過沽隻(25874)？當時指數無啦啦下跌，做咗當日新低24724點，跌461點，如果以「有食唔食，罪大惡極」嘅原則下食隻(25874)的話，以當時高低位做過0.17元/0.016元計，平均沽貨價為0.165元，都有6.82%進賬(平均十格有多架啦)。

呢個weekend真係熱到爆，再加埋呢期自己本身唔舒服，差啲以為自己個心跳跳下會突然熄機；但噚晚睇新聞時話噚日係立冬，今朝轉涼，依家10點10分，我只係feel到勁乾橾同少少涼意，但同「冬」真係無乜嘢可以連系到；不過無咁熱已經好好啦。

今朝恒指低開，一度跌穿24700點，即係話第一層牛證24700至24799點已經全部死亡，呢度有相當於467張期指，依家10點19分，指數仍然處於24800點以下水平，以現價同牛熊證街貨圖擺位比，指數仍然近下方牛證。不過，今朝喺聊天室上追淡倉出動嘅戰友都只能以爬格仔嘅方式出動，甚至中伏，事關指數落到去殺完第一層牛證街貨之後就向上屈返上去，暫時向住250分鐘線(五分鐘圖50線)同保歷加通道頂線出發，只係呢兩個位目前好貼近，唔知上到去之後會唔會又遇頂再回？係嘅話就真係難搞啦。

嚟到10點39分，見恒指跌幅愈來愈窄，連今朝開市個下跌裂口都補埋，開始見好友有啲復仇嘅情況，但事實係今日恒指仍然靠近下牛證街貨，唔通比啲希望好友，引佢哋入局之後先至大舉屠殺？恒指熊(67294)，收回價25250點，同現價有逾400幾點差距，槓桿有逾44倍，都係夠做一日Day Trade，吼恒指五分鐘圖Slow STC(14,3)上到超買水平先至出手。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

即市聊天室/Patreon：https://www.patreon.com/cbbcwar
FB：https://www.facebook.com/cbbcwar