2021年11月3日
噚日恒指開高400幾點之後一直向下，全日出淡倉腦輕鬆完場，指數又彈反近熊證街貨，變返近牛證街貨。今日開市雖然只係微跌38點，不過距離不足200點嘅牛證第一層街貨有相當於643張期指，以街貨方向諗的話，指數怕且又會再向下行。
向來家族都有啲心血管疾病遺傳，我呢個年紀開始嚟料啦，成朝喺個App到預約門診，諗住再轉去專科，搞咗成朝都未預約到，老媽叫我夜啲先搞機會大啲，佢有經驗，信佢！玩完隻App之後恒指都已經正式開市，還好依家9點40分，恒指都只係幾十點上落，開返恒指五分鐘圖見指數仍然處於由噚日延伸落嚟嘅保歷加通道裡面，過多1分鐘，指數開始抽上，保歷加通道口有拓闊情況，唔通指數今鋪向難度挑戰，反方向殺熊？
依家9點56分，戰友紛紛同我分享預約醫生嘅經驗，我亦都繼續分享我喺五分鐘圖睇到啲乜，喺五分鐘圖到嘅走勢都算精彩，先嚟今朝開市出低位「十字星」之後，指數向上但無耐又行咗個「黃昏之星」，指數向下但有50分鐘線(五分鐘圖10線)，但同時頭頂又有條250分鐘線(五分鐘圖50線)喺度，於是喺呢兩條線夾住之下，指數開始行「三角形」，呢種玩法除非快手爬格仔，否則都係得個睇字。
不過，畫完圖無耐就見指數作出「三角形」向下突破，保歷加通道底線同時拓闊，去到10點7分，指數再次失守25000點，再次踩入牛證第一層街貨24900至24999點，呢層亦係牛證重貨區，有相當於643張期指。都話指數同個市邊有咁好死，咁近牛證點會無啦啦反方向走，攞苦嚟辛。
嚟到10點21分，本來喺聊天室叫大家唔好貪心，望住指數殺24900至24999點嘅重貨熊就算，但依家指數似乎直殺落去24800點咁滯。恒指熊(66979)，收回價25400點，同現價有逾500點差距，同一收回價中槓桿最高，睇下吼唔吼得返Slow STC(14,3)上返去超買，或者進取嘅吼 指數彈上50分鐘線時落場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
下一篇：恒指續跌逾200點 友邦領跌
