2021年11月2日
呢期有啲諸事不順，先係做咗電器殺手，個Router壞咗買個新嘅之後，用咗兩日唔夠新嗰一個連Power掣燈都無埋，好彩新買有保養，唯有搵日拎去整啦；繼而幫我家肥貓約醫生去打針，明明附近都有好多獸醫診所，但一係就每次打去約時間，姑娘每次都有唔同版本嘅預約時間(因為仲要夾埋我義工嗰時間一齊去)，一係就要做咗會員先至可以睇得(見識少，真係黑人問號)，原來貓貓睇醫生都咁複雜。
或者唯一順利嘅就係對住個市，至少噚日想出隻恒指Put(29171)點都出唔到，今朝恒指就反方向爆上逾400點開市，一踩就踩返入去熊證第一層街貨25600至25699點呢個位。依家9點43分，恒指最高暫時做過25639點，之後見高位回落，到依家回返落去25600點以下水平，不過，喺五分鐘圖上見恒指目前未踩到任何天線或者保歷加通道頂線，指數隨時咬住呢個高位橫行一段時間，等返條50分鐘線(五分鐘圖10線)上返嚟做到支持之後先至再行都唔奇。
依家10點1分，終於都Book到獸醫幫肥貓打針，陰功要捱兩針，放心啦，屋企有大量零食同罐罐侍候你。睇返條恒指真係幾乎橫行無郁過咁滯，而條50分鐘線就以超過45度角向上奔月咁奔向條指數度，直至到10點7分，指數終於見較明顯嘅高位回落，Slow STC(14,3)其實都一早見高位下行，本身都怕指數落到50分鐘線時又見返個支持，因為恒指現水平又近返熊證街貨嘛，但嚟到10點13分，指數已經穿過咗條50分鐘線，進取嘅呢個位出淡倉再下望100分鐘線(五分鐘圖20線)。
安全啲又點玩呢？可以睇返住條指數落到100分鐘線時有無支持推返上去，同埋Slow STC(14,3)嘅走勢，一旦失守，指數繼續玩高開低走的話，恒指熊(65561)，收回價26050點，槓桿約有36.47倍，夠Day Trade使用。「如果有支持咁點？」咁梗係反手出好倉啦，唔駛問啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
