2021年10月29日

【盤房來料】海底撈一直撈落底未見底

美股確係醒神，道指跟標指屢創新高後稍為唞唞，隔晚又到納指拍住標指創收市新高，不過蘋果公司同亞馬遜嘅季績略遜預期，拖累納指期貨喺亞洲時段向下，港股亦要陪跌，幸而恒指仍守50日線，暫時又唔係話太差。恒指低開88點，早段曾跌241點，見25314點半日低位，50日線(25300)有支持，跌幅曾收窄至39點，見25516點半日高位。恒指中午收報25441點，跌114點；國指收報9013點，跌39點；恒科指跌29點，報6416點。半日成交只有621億元，本來近期港股都係水盡鵝飛靜過鬼，周末前夕更加靜上加靜。

藍籌股大部份偏軟，尤其金融股係拖低大市，友邦(01299)跌1.6%；平保(02318)跟國壽(02628)業績公布後雙雙腳軟，齊齊跌逾3%；大笨象(00005)半日跌0.6%算叫跌得少。建行(00939)低處未算低，季績公布前屢創一年新低，今早又跌0.2%。季績麻麻股價跌好正常，就連上季多賺超過15%廣發証券(01776)半日亦要跌2.2%。金融股走弱，唔知同噚日人行點名批評互聯網券商涉「無牌駕駛」有無關，市場擔心阿爺向券商開刀，加大監管經營境外證券交易業務，到時唔單止互聯網券商遭殃，有幫內地客作境外投資而又無內地經營牌照，都有可能觸犯非法金融活動。其他重磅股ATMX只有美團(03690)力保不失，上半場逆市升0.2%，騰訊(00700)跟阿里(09988)半日跌0.7%，小米(01810)跌幅超過1%。

啤酒股繼續有資金湧入，過往一直落後嘅百威亞太(01876)終於發力，連續兩個交易顯著上升，今日股價再升4.8%。青啤(00168)首九個月盈利增長21%，半日升3.3%；潤啤(00291)亦錄得3.3%進帳。唔單止啤酒股做好，乳業股亦有理想表現，最勁係細過粒骰嘅莊園牧場(01533)，半日無乜成交乾升三成，呢啲擺到明人為操控，好睇唔好食。其他乳業股就唔同有價有市有成交，阿Man愛股之一嘅蒙牛(02319)，本周一喺聊天室內推介，當時買入價係47元樓下，短線目標價50左右，又交到功課，有貨周末前食半留半，減低持貨成本再等創新高。其他乳業股亦見上升，但阿Man始終都係愛龍頭。除咗啤酒牛奶，今日豬肉股同之前跌到一仆一碌嘅餐飲股亦有炒作，唯獨海底撈(06862)愈撈愈底，半日再跌2.2%，暫時未知幾時見到底。

麥狄文
(徐狄怡‧證監會持牌人)