2021年10月27日
噚日揀咗隻港交所(00388)牛證(54805)出嚟，下半場見股價喺保歷加通道裡面上上落落，同步見保歷加通道愈嚟愈窄，心諗港交所都應該守得下掛。誰不知今日恒指開市跌逾240點，指數落返去25795點開市，聊天室有戰友問定開市出淡倉可唔可以，望望牛熊證街貨圖見開市呢口價已經殺咗首兩層牛證，呢度夾埋得300幾張期指，踩住嘅25700至25799點有成600幾張，隨時開市向下殺埋。結果，開市頭五分鐘已經見恒指最低做過25676點，過千張期指又袋袋平安，隨時今日班行又提早收工，剩底嘅就係班老散自己慢慢玩。
至於隻港交所，今早U盤時都有企硬過一陣，但到9點20分時都頂唔住恒指嘅跌勢，至依家9點40分，港交所做緊479元，跌0.5%，算叫做未係好入肉。不過，嚟到9點46分，恒指日明跌幅收窄，喺五分鐘圖上仲曾經出現過想做「早晨之星」嘅物體，reload多一下之後即刻變晒樣，連同隻港交所都跌深咗。
我家肥貓如常喺地下塊抓抓板上面瞓覺，唔知係唔係佢發惡夢，忽然間好驚咁跑走，仲跑咗過嚟我附近，出動零食冷靜都無動於衷，隔咗一陣佢自己行返去抓抓板上面繼續瞓，然後我再望返個市時已經見到指數連25600點都穿埋，不過似乎食晒頭四層牛證飽得滯，跌幅又開始收窄返。至於港交所方面，喺五分鐘圖上見476.2元出「平底」後，股價都見回升，第一個check point應該就係佢條50分鐘線(五分鐘圖10線)，過得到嘅話，(54805)就捱多陣，過唔嘅話，都真係無辦法死捱，鬼叫今日個市咁好跌咩。
今日已經27號，仲有兩日就完10月，望返今個月自己戰績真係做得唔好，基本上係今年內最差嘅一個月，唔通今個月流月不利？還是不宜短線？如果真係有一個月曆係分十二生肖，再喺月曆上mark底邊啲生肖宜乜乜、忌乜乜，我估都真係有人會想要。
既然今日個(我覺得自己)不宜短炒的話，試下搵返啲中線少少嘅嘢先。睇恒指日線圖，10月20日裂口高開指數上到26200點樓上再橫行五日，至今日再裂口下跌，落返去25600至25700幾點，即係話指數喺26200點時前後都有裂口，令指數喺26200點時變成孤島，仲要咁高位即係「孤島頂」啦，再加埋Slow STC(14,3)終於都行完超買再超買今日見高位回落，一副開長Put咁嘅樣。
恒指Put(20294)，行使價25400點，輕微價外，低引伸，槓桿吸引，出年1月28日到期夠玩啦，我都好想等恒指五分鐘圖Slow STC(14,3)上返去超買水平時先出手，但唔知有無咁嘅機會呢。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
FB：https://www.facebook.com/cbbcwar
