2021年10月20日

【輪證贏家】恒指Call追熊證街貨

噚日下半場冷靜過後，喺臨完場前半個鐘重新將牛熊證街貨同恒指現價，以及恒指目前嘅走勢再拆解多一次，得出結果係可以試吼好倉博過夜，聊天室戰友們亦落注出Call。依家9點29分，恒指完U盤高開逾280點，開報26074點，恒指熊證首兩層街貨全數死亡，呢度夾埋有相當於743張期指，聊天室好倉過夜策略成功。

快睇個恒指牛熊證街貨圖，今日見恒指牛證街貨都有新增街貨層，最貼價上到25300至25399點，不過以恒指目前開市價同最貼價牛證都有成700點差距。至於熊證目前最貼價上移至26000至26099點，呢度係熊證重貨區，有過千張期指駐守，一旦稍後時間指數上破26100點嘅話，咁呢度所有熊證都宣告死亡，變相今日恒指可以殺2041張期指。未幾，恒指正式開市，截至依家9點40分止，最高做過26156點，換言之26000至26099點重貨熊證全數陣亡，所以喺聊天室再三提醒有貨過夜嘅可以先行收割，之後嘅事，之後再追。

一開市無幾耐就食咗成2000張期指，恒指某程度上都可以話收得工。換個日線圖八掛下，指數噚日上破50天線後今日再高開，好友目標的確可以上移至100天線(約26692點)，不過，要捱得到上呢個位，怕且都要問過處於嚴重超買水平嘅Slow STC(14,3)先可以；當然，如果市場上未有再貼價牛證街貨出現，要個市無啦啦反方向去殺牛，除非成個中環都失心瘋啦。

依家9點47分，聊天室裡頭好倉嘅走咗，反手出淡倉嘅都可能出咗(有部份戰友仲爬格仔食埋餬)， 的確，指數靠近熊證街貨，呢位位出淡倉以偷位出入為上。嚟到10點正，指數喺五分鐘圖上見稍回兼同50分鐘線(五分鐘圖10線)開始接近，一旦見50分鐘線有支持的話，恒指Call(22903)，行使價26600點，同現價有逾2.3%價外，引伸偏低、槓桿吸引、低街貨，可以考慮小注出動；當然啦，安全嘅就等返五分鐘圖Slow STC(14,3)回落返去超賣時先出手啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

聊天室/Patreon：https://www.patreon.com/cbbcwar

Facebook：https://www.facebook.com/cbbcwar