2021年9月21日
噚日上咗架恒指熊(66037)子彈火車，可惜個位入得唔靚之餘，喺小時圖仲見到粒「十字星」，於是就放走咗隻(66037)，當時恒指跌幅愈縮愈有，最高返番上24100點以上水平。全日收市報24099點，跌821點；不過喺五分鐘圖上見到Slow STC(14,3)兩線上到嚴重超買水平位置，且%K線已見高位回落%D線；再加上噚晚美股同今朝日經出現明顯下行走勢，恒指今朝開再跌231點，報23867點。
趁未正式開市時望下個恒指牛熊證街貨圖先。噚日恒指向下殺落過千點，最貼價牛證街貨層落到去23800至23899點，呢度有相當於18張期指，其實睇返成個牛證區，都會見到特每層都有新增街貨流入，反映唔少資金都博今日會出反彈，咁都估到嘅，恒指連24000點都無埋，唔通真係跌到0咩。而重貨區就喺23500至23599點，呢度有相當於1029張期指。
至於熊證區方面，就見到最貼價層都係落到去25000至25099點，呢層都唔弱架，有相當於699張期指。睇返今日新增嘅熊證，最貼價落到去24539點，換言之星期四(9月23日)返嚟就會見到熊證最貼價層落去到24500至24599點；除非今日恒指向上撲殺上24600點或以上啦。
到恒指正式開市，都見指數有繼續向下衝落去嘅現象，再過多10分鐘就見到指數喺五分鐘圖出咗粒「射擊之星」嘅物體，心諗：唔會掛，彈都未彈過就出粒咁嘅嘢？連一條天線都未掂到喎？再過多五分鐘，指數已經見拗腰回升，Slow STC(14,3)原本由噚日嘅嚴重超賣水平向下落到中軸位左右就凌空反彈，至依家9點53分仲轉埋燈，暫時最高做過24188點，升逾60點，計埋今朝跌嗰231幾點，即係其實反彈咗成260幾點，喺呢期咁弱嘅市況嚟講，佢都算係咁啦；不過，又話時話，唔彈高邊有得跌？正如唔加價又邊有得減？民意唔正數又何來可以變負數？
同班老友+舊同事whatsapp完一輪中秋快樂之後，已經嚟到10點3分，指數浮浮沉沉咁喺轉綠燈同紅燈之間，睇返恒指五分鐘圖見其實今朝向下插完之後，指數so far都喺保歷加上升通道運行中，只係整條保歷加通道未見明顯呈上嘅情況，計計保歷加通道頂同底闊度有115點，但問題在於恒指今日玩慢活，都係切個月餅應下節算啦。
今日中秋正日，祝大家中秋快樂！公司可能會早啲放你哋走，不過今日恒指係無半日市架！【下半Part】再見！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
