2021年9月3日
噚日隻恒指Call(21566)真係麻煩，鬼叫小時圖高位出咗「穿頭破腳」，如果唔係都想守佢一陣(Call嘛，唔會死嘅)，但同步見到恒指五分鐘圖條保歷加通道窄到真係無計，確實是忍咗好耐，事關噚日恒指大部份時間都咬住26000點唔放。
最終忍到下晝大約2點40分，終於見到恒指喺五分鐘圖上破咗條中軸，跟住再捱到2點55分，Slow STC(14,3)兩線都上到80以上嘅超買水平，呢個情況維持至3點15分左右，指數上破咗少少保歷加通道口之後回落，同時都見Slow STC(14,3)兩線由嚴重超買水平向下回落，(21566)逃生門出現，以當時高低位做過0.126元/0.124元計，平均走佬價為0.125元，執身彩打個和。都係嗰句：唔係見到小時圖高位出「穿頭破腳」，(21556)都唔駛趕住執包伏走人。
嚟到今朝恒指低開60幾點之後，跌幅一度擴大至逾200點，不過好快喺恒指五分鐘圖上見Slow STC(14,3)超賣觸低回升。再換個小時圖出嚟見到，受到噚日「穿頭破腳」影響，喺小時圖上見指數下行，只係下行嘅斜度(力度)唔算高，以依家10點4分計，指數一度跌穿過20小時線(小時圖20線)，但喺小時圖第二粒燭上見，目前又守得返條20小時線，而Slow STC(14,3)兩線勢頭仍呈下並回落至接近中軸位置，似乎暫時仲未有確定方向。
「小時圖守得到20小時線，咁係咪都唔好太淡呀？」都係架，事關喺五分鐘圖上見到今朝恒指暫時做過嘅低位其實出現咗「穿腳破頭」利好形態，所以由9點55分出現至依家10點11分止，喺五分鐘圖上見恒指回返上去嗰度力都唔弱，還好喺聊天室一早框起咗「穿腳破頭」，講底以好倉出小注試水溫先，方向正確之後先至再大膽揸耐少少，隨時呢一注係我喺秒投嘅聊天室最後一注正數都唔奇，因為過埋今日嘅4點10分就係我喺秒投聊天室裡面最後一個交昀日(聊天室聽日正式關門大吉)，只係打算抖一陣之後先至再重新開檔。
恒指牛(63285)，收回價25400點，同現價有逾500點差距，同一收回水平的牛證中槓桿最高，基於依家(10點15分)恒指五分鐘圖見Slow STC(14,3)上緊去超買位置，都係等佢回返落嚟先至進場，大前題係以小時圖20小時線有支持+恒指現價貼近熊證街貨+日線圖上指數仍處於20天線及Slow STC(14,3)兩線呈上先至出手。
「咁煩嘅...」哦，咁單計以恒指五分鐘圖用Slow STC(14,3)落到超賣水出手，做一趟swing trade DT收工囉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
