2021年8月26日
噚日揀咗隻恒指Put(11475)出嚟，不過下晝見恒指五分鐘圖無啦啦彈得起勁，十分鐘圖又破咗保歷加通道中軸，小時圖仲踩返上去50小時線(小時圖50線)，所以喺[下半Part]時都有講過隻(11475)行埋一邊先，再等位落。一等就等到接近收市前，大約3點45分，喺五分鐘圖上見Slow STC(14,3)兩線上到超買至嚴重超買嘅範圍，其實呢個時侯都有同聊天室戰友講可以試小注出淡倉過夜，博第二日Slow STC(14,3)會由高位回落。按臨收市前15分鐘入(11475)計，以當時高低位0.164元/0.162元，平均買入價為0.163元。其實噚日喺FB都有讀者問到隻(11475)，都已經喺Comment位回覆話比佢知噚日下晝計尾市嗰段時間Slow STC(14,3)上到超買位係可以入，捉唔捉到位就真係靠自己啦。
依家9點42分，恒指今早開市微跌20點之後已見跌幅擴大，喺五分鐘圖上見到，由於保歷加通道本身唔闊，所以好快就落到保歷加通道底線。嚟到10點7分，見指數都仲係得百零點波幅就知保歷加通道真係好窄，喺小時圖上見再出多粒燭，受制於10小時線(小時圖10線)以下水平嘅同時，下方又有條50小時線，換言之指數暫時被呢兩條線夾住，見Slow STC(14,3)兩線喺中軸水平附近向下，(11475)就放多陣先啦。
又望望恒指牛熊證街貨圖，好似好耐都無喺呢度睇過咁。今日見牛熊兩邊都無新增街貨層，而噚日朝早恒指忽然攀升，將首兩層熊證殺死，嚇到25900至25999點嘅熊證都魂飛魄散，今日見得返12張期指。至於下方牛證今日見無新增層，最貼價為25300至25399點，有相當於416張期指，中間位為25649.5點，其實同噚日恒指收市價25693.95點差唔多。截至依家10點19分，恒指做緊25612點，跌81點，數值上叫做近返牛證街貨層嘅，不過都開咗市成個鐘，恒指高低位暫時只有168點，睇嚟今朝個市都可以暫時唔駛睇住先，轉台睇殘奧啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
