2021年8月19日
噚日隻恒指牛(52951)喺朝早落咗場之後，一直陪住恒指慢行上到26000點樓上之後開始有啲腳軟，如噚日所指指數上行嘅同時見到DMI嘅ADX向下，回落到大約下晝1點45分，指數終於頂唔住向下穿咗保歷加通道中軸，且跌勢未止，見指數仲向保歷加通道底線衝落去，同步整條保歷加通道呈下，呢啲時間(52951)可以收工，以1點45分至1點55分見住指數衝落保歷加通道底線走貨計，(52951)高低位做過0.05元/0.048元計，平均走佬價為0.049，對比噚日上晝平均落場價0.048元，和到手續費當無事發生過。
依家9點49分，恒指開市跌70幾點至跌百幾點，見五分鐘圖指數沿住保歷加通道底線向下落，而整條保歷加通道亦向下運行中，不過呢幾日恒指開市都係悶悶地，唯有同聊天室戰友們講開小住開淡倉試咗水溫先；反而電視依家直播緊奧運港隊代表巴士巡遊仲好睇過個市，有戰友表示佢公司附近有得睇，但下午有Mirror仲精彩。
可能個市都要吸引老散們嘅目光，依家9點57分，向來無到10點都未瞓醒嘅恒指，依家醒晒，皆因一路睇住電視直播時，見到show住嘅恒指已跌逾270點，再開返恒指五分鐘圖已經見到兩支大陰燭向下殺落，保歷加通道口亦見拓闊，還好今朝同戰友們講小注開淡倉試水溫，睇嚟依家呢個試水溫隨時啱飲，事關Slow STC(14,3)都見到兩線落到超賣至嚴重超賣，之後再跌就之後再追。
嚟到10點18分，運動員都去到戲曲中心落車，至於恒指就再次見到跌返落去300幾點，截至依家為止見指數最低做過25509點，睇返街貨圖見牛證第一層25600至25699點全數死亡，呢度有相當於278張期指，而25500至25599點呢度其實都可以當埋佢哋死晒，呢層有相當於277張期指，兩層夾埋就有相當於555張期指，嚟到10點21分見指數都確認下破25500點以下，再過多幾分鐘，跌幅逾400點，淡倉DT再追的話，隨時要換上小時圖博Slow STC(14,3)向嚴重超賣方向出發先得。
進取的話都試等指數喺五分鐘圖上到50分鐘線(五分鐘圖10線)附近無力再上嘅話先至出淡倉；安全嘅則可以等返條Slow STC(14,3)先至出手，恒指Put(17917)，行使價25400點，同現價約有0.64%價外，低引伸，槓桿偏高。揀Put嘅另一個原因係還記得噚日因為價內而走咗隻(11363)嗎？之後咪話換馬嘅？如果仍然以日線不破20天線繼續出淡倉的話，就用(17917)補上，當(17917)再價內時又再換馬。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
