2021年8月18日
噚日手揸兩隻Put，先睇隻友邦(01299)，業績優於預期都算，仲話睇好中國市場(something like that la)，搞到隻Put(23350)high到傻咁滯，唯有等五分鐘圖股價同Slow STC(14,3)回落先至搵位走，輸少當贏。最終等到臨收市前15分鐘，股價同Slow STC(14,3)都一齊落，呢個時候輸隻(23350)嘅話，以當時高低價0.093元/0.088元計，平均止蝕價為0.0905元，對比之前嘅平均買入價，斷臂輸31.7%。
呢個8月我都承認係Trade得麻麻地，可能無咗7月嗰兩日大跌市有咁大方策可以輕鬆Trade，但唔緊要，仲有隻恒指Put(11363)在手，噚日指數下行隻(11363)都有唔錯嘅表現，之但係去到止蝕隻(23350)時，發現(11363)已經由價外變成價內，同時輪價亦已升至0.25元以上水平，基於價外變價內=有時間值同內含價值，隻輪嘅最強爆發力已經出現，都係時侯要換馬啦，所以喺走隻(23350)嘅同時都走埋隻(11363)，以同一段時間計，(11363)高低位0.255元/0.25元，平均價為0.2525元，一計之下hold咗一日定兩日嘅(11363)有15.03%利潤，尚算叫做Cover到一半(23350)條數啦。
依家10點20分，我家肥貓瞓至反晒肚，恒指五分鐘圖見指數喺開市後浮沉咗一段短時間之後就踩住保歷加通道中軸上行，至依家已經見升過百點，幅度同力度比起噚日下跌嗰時真係小巫見大巫，不過乃念小時圖Slow STC(14,3)兩線處於超賣水平，比啲時間佢做少少技術反彈啦，如果唔係邊度有位再入返隻新嘅價外恒指Put，再追恒指日線繼續下行呢？
又咁講，喺等嘅時侯嚟轉反手爬格仔策略亦未嘗不可，「貪心鬼？」一罐小貓罐罐仲貴過我一罐茄汁豆呀，大佬！我都唔係日日食茄汁豆架！
正如前文所指，恒指小時已見Slow STC(14,3)出現觸底反彈，喺小時圖上依家出咗第二粒燭出嚟，並作勢挑戰10小時線(小時圖10線)；再返轉頭見五分鐘圖，指數繼續沿住保歷加通道頂線上行至忘我境界咁滯，而Slow STC(14,3)仲有幾步路先至上到超買位，一旦拉到最後上到嚴重超買嘅話，怕且小時圖都可以成功上破10小時線，屆時隻恒指牛(52951)，收回價25473點，同現價有近430點差距，約60倍槓桿夠做DT。
「萬一上破唔到咁點呀？五分鐘圖都有條500分鐘線(五分鐘圖100線)仲未破到喎！」哦，咁好簡單啫，恒指熊(57721)，收回價26332點，同現價有約440點差距，都有37.52倍槓桿架。
大個啦，要學識睇住啲線做Trade啦，無事嘅，師傅愛你！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
