2021年8月5日
依家每日都要早半個至大半個鐘頭起身，事關我家多咗隻肥貓之後，每朝起身第一件事已經由以前開電視睇新聞，變成尋寶。今朝喺廚房個架見到佢，當佢被發現之後就Boom一聲跳咗去雪櫃後面，我家老爺正打算開吸塵機嚇返佢出嚟嘅時侯，忽然見到隻肥嘢已經匿返喺佢個竇度，依家9點16分，兩人一貓一齊睇緊女子空手道個人形初賽，劉慕裳加油！
嚟到9點34分，恒指今朝又係開市跌30幾點之後向下走，Slow STC(14,3)都見%K線跌穿%D線，保歷加通道口亦有見微微拓闊，不過見到騰訊(00700)今朝早五分鐘圖條Slow STC(14,3)都處於接近超賣水平，一旦騰訊鯉魚翻身，又會無啦啦推返恒指向上。
雖則賣仔莫摸頭，但今日見到銀娛(00027)喺9點41分升1.39%，即使佢噚日搞到我輸咗三格，不過見佢暫時跑贏大市，有種莫名其妙嘅安慰。再過多4分鐘，見恒指五分鐘圖兩支陽燭向上破到去保歷加通道頂部，都有喺聊天室同戰友講低，出好倉順勢再追係可以，安全嘅就睇埋條保歷加通道口有無拓闊，比位恒指再去先再追，反正依家Slow STC(14,3)仍然喺中軸水平。
其實今朝喺聊天室都有揀咗隻正股出嚟，就係友邦(01299)。揀佢嘅原因只係因為今朝喺五分鐘圖上見到Slow STC(14,3)兩線落到嚴重超賣水平，博嘅都係喺即市裡面出現swing trade，將股價推返上去。不過依家9點54分都仲未見到友邦出Swing trade，反而喺92元有啲企穩，咁你企下先啦。
友邦牛(53923)，收回價86元，同現價約有6.7%差距，五分鐘圖股價上破到50分鐘線先出手啦，我呢幾日黑氣，自己paper trade住先。
準備睇乒乓球女子團體銅牌戰，香港對德國，對眼唔得閒聲都要聽啦！教練話企中間就得架啦！加油呀！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
