2021年8月4日
噚日敗走咗隻恒指熊，但下午恒指收窄返原來同噚日官媒收返起「精神鴉片」篇報道有關，仲要話呢種鴉片係「成長數千億產業」，彈出彈入；但同步都再次證明同強調唔對路走人絕對唔係凹水嘅行為，事關政治市唔係人咁品。
依家9點10分，今朝我家肥貓匿咗喺焗爐後面，花咗一輪功夫又氹又乜，最後喺佢隔離開電水煲個掣煲水，就會自動走人，離開廚房再跳上梳化，經過DoReMi三個位之後再跳上台窗入貓屋，早響，駛乜我搞咁多嘢，同時又證明咗你已經學識開廚房度門啦；還好仍趕得切喺U盤前開得到電腦，做到部份稿件工作，如果唔係一開市我又即刻爆廠。
今朝恒指開市微跌30幾點，開市都係處於26100點以上水平。五分鐘圖見指數尚算企喺五條主要平均線之上，Slow STC(14,3)兩線勢頭呈上，只係換去小時圖見指數仍然要爭咁啲力去上50小時線(小時圖50線)，當然，佢有權變成一個阻力，然後掉頭向下。
嚟到9點43分，恒指終於都見方向，小時圖50小時圖果然變成阻力，只係Slow STC(14,3)兩線未確認向下。而喺五分鐘圖上則見恒指喺窄窄的保歷加通道浮浮沉沉，捉佢真係難過捉我家肥貓。
指數難玩唯有向個股埋手。噚日澳門爆出新變種病毒確診，仲要一家四口都中晒，噚日已經有新聞出嚟話澳門再次落閘，加強返過關嘅檢測同要求，濠賭股唔駛審，唔跌就有鬼；不過本身都受疫情影響，跌多兩步同跌少兩步都好似無乜分別。
行業大佬銀娛(00027)受疫情影響，股價不斷沉底，至今朝受到噚日呢單消息影響，更見裂口下挫，不過，喺恒指未無啦啦向上屈上升逾300點之前，見銀娛股價喺五分鐘圖都觸底回升嘅走勢，只係嚟到依家10點6分見股價上到50分鐘線(五分鐘圖10線)有止步嘅情況。
換個小時圖則見銀娛今早低位出「錘頭」，同步Slow STC(14,3)都由低位回升，適逢下個星期五(8月13日)出中期業績，銀娛牛(69875)，收回價45元，同現價有逾5%差距，逾12倍槓桿DT都適合，因為啲Call最貼價嗰隻都同現價有逾22%價外，所以唯有向牛證落手，吼五分鐘圖見Slow STC(14,3)落返去超賣位時小注入場。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
