2021年8月2日
相信唔少中港台嘅人都睇住噚晚中國同台灣嘅羽毛球女單決賽，兩位選手比賽相當落力，由於比賽關係，總有輸贏，但兩位選手都帶比全地球一場好精彩嘅賽事，相信係所有人心目中，就算失落金牌都已經係贏咗！
嚟到8月份，「春秋二祭」嘅中期業績已經展開，今個星期開始進入高峰期，今日中午會有滙豐(00005)同恒生(00011)打頭陣，收中電(00002)利息嘅「好息之徒」都留意今日宣布派幾多啦！
恒指今朝早開市重上26000點以上水平，睇牛熊證街貨圖就見到熊證最貼價落到26200至26299點，呢度有相當於40張期指；而牛證最貼價層為25600至25699點，有相當於72張期指，其實都見到整個牛熊證街貨圖嘅街貨量都唔係好多(最近嗰五層都未見有過500張期指街貨喺度)，都幾反映到市場傾向玩且戰且走同即日鮮。今朝未開U盤時已同聊天室嘅戰友睇咗個街貨圖，咁啱上個星期五(7月 30日)恒指收市價個位就正正處於牛熊街貨嘅中間。不過依家完U盤，恒指彈高，亦靠近熊證街貨，問題在於恒指五分鐘圖上Slow STC(14,3)都同時上到超買水平，只怕高開後低走嗰時，係大大力向下插返落去，還是小回之後踩住天線再上。
嚟到9點55分，恒指已經由升轉跌，但睇返五分鐘圖見保歷加通道其實整條係呈上，今早高開之後幾次頂穿咗保歷加通道頂線後回落，至今雖然回落返去保歷加下降通道，唯留意到保歷加通道口開市至今都沒有拓闊，亦沒有收窄，只係keep住一個闊度上落中。有啲悶，要等。
依家10點26分，同聊天室嘅戰友一齊等到痴呆，較早前喺五分鐘圖見到指數回到落保歷加通道底，Slow STC(14,3)兩線都處於超賣水平時，指數抽高，本以為可以出swing trade好倉，等指數trade返上去。覆個message之後見到恒指終於彈返上去，五分鐘圖「V型」反彈清晰可見，可惜嘅係今日幅度唔夠大，如果唔係仲正！
恒指牛(52023)，收回價25450點，同現價有約430點，槓桿有約56倍。五分鐘圖恒指依家就彈咗上去架啦，問題係破唔破到個「V彈」頸線啫，破到嘅話小時圖Slow STC(14,3)如處中軸再見上行，(52023)可以小注試追；破唔到嘅話，轉台睇奧運啦！晏晝點幾有乒乓球女子團體賽，港隊爭入四強呀！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
