2021年7月15日
經過前日「日常白痴」唔知郵局閂4點半而白行一趟之後，噚日醒啦，一搭正4點收市之後就拿拿聲換衫落去郵局拎份件，「好緊要架咩？」唔係呀，書一本；「再唔攞就會退走咩？」唔係呀，deadline係27號；「真係咁好睇？」應該唔係，只不過純綷個人無耐性、太心急同唔等得。
今朝我家老爺又唔駛返公司，事關下午佢先至出動去做採訪，變相今朝多咗個人喺屋企，本時電視係熄咗嘅，今日就熱播NBA中。喺一片NBA電視聲之下恒指開市又嚟玩微升，升得嗰13點。到9點半正式開市，恒指仍然未見方向，只見日線圖上10天線持續向下，暫時睇都仲叫做做緊阻力嘅。
指數唔啱又向個股埋手。見睇返噚日bookmark咗隻港交所(00388)，mark佢嘅原因係見佢日線圖Slow STC(14,3)兩線上到超買至嚴重超買水平，咁當然係吼佢條Slow STC(14,3)高位回落出淡倉啦。截至依家9點36分，港交所股價雖然跌緊，不過日線圖上又未足以令到佢條Slow STC(14,3)出現高位下行。貪心鬼開個小時圖出嚟就見到股價下行至接近保歷加通道中軸水平，一旦跌穿真係可以開個淡倉再追落，問題只係在於小時圖保歷加通道口可唔可以拓返闊少少咁啫。
嚟到9點54分，恒指似乎搵得到方向，升幅擴大至升151點，報27938點，最高見過28007點，但喺五分鐘圖上見到指數上到28000點附近出現疑似「平頂」格局，指數再次回落；不過，基於小時圖上破10小時線(小時圖10線)，同時Slow STC(14,3)都見兩線勢頭呈上，怕且今日對住條恒指都不宜太淡，所以都有同聊天室嘅戰友講睇住恒指五分鐘圖，如果見到指數回落至最近平均線時有力再彈高的話，好倉可以小注出動，如恒指牛(64000)，收回價27400點，同現價有逾500點差距，約53.7倍槓桿Day trade夠用啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
