2021年7月12日
上個星期五(7月9日)朝早出隻恒指牛(61041)，平均買入價為0.1025元，只不過上個星期五同個朋友食完飯返到屋企之後，開個恒指五分鐘圖見到條Slow STC(14,3)剛啱喺超賣水平，所以喺上個星期五嘅【輪證下半Part】裡面講低，唯有等恒指五分鐘圖Slow STC(14,3)由超賣位上返去超買位就放啦。本來見條Slow STC(14,3)都回升得好地地，誰不知彈到3點半到Slow STC(14,3)上到中軸位之後就再向下沉；唔通個市真係要九連跌？反正聊天室戰友們都喺恒指叉穿250天線之後見回穩入注細Call博過夜，(61041)博一博，隨時好賠過歐國盃冠軍買意大利。
今朝比平時早起，我都唔係好知點解，不過唔緊要啦，反正今日lunch time又約咗人食lunch，所以連U盤都未開始就推咗隻移卡(09923)喺Patreon。依家9點15分，恒指做緊U盤，見到大部份股份都呈綠色，即月期指升逾300點，估計今日恒指開市報嗰口價都唔會差得去邊，如果一開市就見到恒指五分鐘圖條Slow STC(14,3)爆到上超買水平的話，唔單止隻(61041)，基本上所有過夜好倉都可以走人先，之後嘅事就之後再追。結果，今朝恒指開市報27670點，升逾300點，而到依家9點38分，恒指升幅略為收窄至升223點，報27568點，不過恒指五分鐘圖就仲未見到條Slow STC(14,3)上返去超買位，返而只係喺中軸水平見%K線上咗%D線，為免市場反彈減持令今日恒指出高開低走嘅情況，(61041)都係走人算數。以開市首10分鐘計(61041)高低位0.131元/0.124元，平均沽貨價為0.1275元，過夜恒指牛平均賺24.4%。
嚟到9點49分，恒指升幅持續收窄，到依家得返111點升幅，做緊27456點，見ATMX四隻升幅都收窄，其中騰訊(00700)仲一 度倒跌，怕且反彈減磅呢個動作似乎大家都好有默契。再過多4分鐘，恒指升幅愈縮愈有，喺五分鐘圖上已見指數回原本處於五條平均線之上，到依家先失1250分鐘線(五分鐘圖50線)，再失50分鐘線(五分鐘圖10線)，觀乎小時圖Slow STC(14,3)兩線於中軸水平橫行重疊，轉睇30分鐘圖則見Slow STC(14,3)高位回落，所以聊天室反手動作已經準備。
依家10點1分，恒指升幅進一步收收至不足150點，但喺五分鐘圖上見指數彷彿於保歷加通道中軸似有支持，可惜小時圖出今日第二粒燭見到低於保歷加下降通道範圍，唔通今日係傳說中嘅彈散市？不過，依家只係見到指數喺五分鐘圖上戀住條保歷加通道中軸唔上又唔落，知你上個星期食牛證放題已經食到飽、食到滯，但阿市你打算脹住個肚躺平喺條保歷加通道中軸唔上唔落到幾時？
就以保歷加通道中軸為界線，將swing trade嘅幅度收窄到中軸到頂或者中軸至底，怕咗你。如果上得過的話，恒指牛(57183)，收回價26850點，同現價有約746點，41倍槓桿，DT上望保歷加通道頂部；但如果穿咗條保歷加通道中軸的話，恒指熊(63408)，收回價28050點，同現價有約453點差距，槓桿約36倍，DT目標下望保歷加通道底部。安全做法當然係等條Slow STC(14,3)配合埋做swing trade啦，只恐怕等到天荒地老啫。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
