2021年7月8日
睇嚟啲黑氣終於都散散地啦喎，先係噚日隻恒指Put(27683)不消半日就快手均賺5.7%，補返前日死咗喺小米牛身上嘅錢；其後冷吼隻中生製藥(01177)，仲好鬼進取咁揀咗隻中生牛(55876)，喺噚日朝早11點30分至11點50分，見到中生五分鐘圖Slow STC(14,3)兩線落到嚴重超賣水平，但同時見%K線上返%D線樓上，於是落隻(55876)，平均買入價為0.1055元。
去到噚日下大約1點40分至2點5分，見到中生製藥五分鐘圖Slow STC(14,3)上到超買水平，望望隻(55876)諗住呢趟swing trade完啦，咩話？證價都係做緊0.108元咋？和得到個手續費咋喎！算啦，反正冷吼嘢向來都係小注為主，同埋隻(27683)和咗小米牛，變相7月無事發生過咁，博一鋪過夜啦。
今朝起身見到噚晚美股同今朝日經好似都係變動唔係好大，再同聊天室戰友開埋個牛熊證街貨圖睇，一如噚日同佢哋所講，熊證就算有新增街貨層，但街貨量都唔會多，反而個市七連跌，愈嚟愈多資金開始博反彈，而且博反彈嘅力度會變得愈嚟愈進取，因為個個都心諗：都跌咗咁多日啦，係時候要彈架啦！今次仲唔輪到我捉到轉角？揀隻貼價牛嚟會一會你，博第二日裂口高開先。(呢一個亦都係之前提到我舊老細焚爺嘅all or nothing策略)，結果，令到牛證愈來愈重，熊證就算追多兩步，但都因為重牛又再次扯低咗恒指水平，令恒指現價同熊證嘅距離又再次拉闊返，兼且再引指數繼續向下殺牛，如是者每日咁loop落去，就形成今日(截至依家9點40分止)恒指出八連跌啦。
「咁幾時先會停呀？」最簡單嘅方法就係等熊證街貨真係出得再多同再貼恒指，同時儲嘅貨量開始有啲睇頭，再唔係一層先得嗰幾十張街貨，而同步係咁捉轉角嗰班都放棄，轉陣順勢炒落，一齊幫熊證街貨增磅；再配合埋技術分析如Slow STC(14,3)低位確認到回升，咁恒指就有機會跌停，甚至回升。
依家9點57分，恒指開市跌70幾點之後指數一直向下，至依家跌幅擴大至跌385點，做緊27575點，其實喺恒指開完U盤時已經見到五分鐘圖上Slow STC(14,3)由噚日處於嚴重超買水平向下，並跌穿保歷加通道中軸，所以都叫咗聊天室戰友追淡倉，追到頭先有見過Slow STC(14,3)準備到底所以叫大家小心，但再reload多一下條指數，連保歷加通道口都拓闊埋，呢注淡倉可以安心守落去。
至於唔覺意過咗夜嘅中生製藥，今朝完U盤時反而見到逆市造好，到正式開市之後見股價都向上走，但留心睇條Slow STC(14,3)，就發現有頂背馳嘅情況，為免又見血同埋一個咁強嘅訊號出現，更係走佬啦！按開市首15分鐘走(55876)，以期內高低位0.117元/0.11元計，平均走佬價為0.1135元，呢注過夜平均賺幅為7.6%，唔係一個好理想嘅過夜成績，不過總算有得袋，兼且頂背馳唔走真係隨時死得人多。
望返恒指日線圖，噚日都講過指數已失守「楔形」底，即使Slow STC(14,3)兩線落到10呢個超賣區間，但保歷加通道底線仍然見拓闊，下望目標會唔會到250天線(27114點)？喺未見恒指有任何轉勢嘅原因之前，開好倉的確係勇士嘅行為。
不如咁，恒指Put(24250)，行使價27500點，今年10月28日到期，低引伸兼槓桿適中，換股比率8000都OK敏感度高，等五分鐘圖Slow STC(14,3)上返去超買位時出手，逐下逐下Put佢落去，一價內如見指數日線仲有得落，換馬再轉隻價外追。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
