2021年7月6日
天文台今朝早掛咗一號戒備信號，不過出面風和日麗咁，真係打風之前個天係咁靚嘅？早喺十幾年前如果見到呢啲咁靚嘅天氣，晨早已經同我老友Marilyn去咗沙灘玩啦，回憶總是美好；更美好嘅喺前日洗嗰機衫喺噚日已經乾晒，作為一個C9，應該會回心微笑。
依家9點49分，恒指已經開咗市，今朝早微跌得6點，基本上開睇恒指五分鐘圖都唔知個意義喺邊，唯有喺聊天室同定大家講「如果五分鐘圖上250分鐘線(五分鐘圖50線)見阻力的話，就出淡倉啦，主要原因都係因為見到恒指現價仍然近牛證街貨堆，而27900至27999點都有成1337張期指；結果到搭正9點半之後，個市就即刻向下落咗去，未幾28000至28099點第一層牛證已全數死亡，而截至依家9點53分止，最低做過27904點，換言之第二層嘅27900至27999點同死晒都無乜分別，不消一個朝早已經有相當於1700張以上嘅期指街貨bye bye。
用返日線圖去量度恒指的話，講咗成個星期嘅大型「楔形」底總算都叫做跌穿咗，連同噚日所畫嘅Fibonacci 0.382都無埋，還好日線圖Slow STC(14,3)兩線就嚟到底，呢一刻有淡倉喺手而想再追埋落去，又或者依家先嚟開始追的話，等同食隻雞翼連軟骨都食埋。
指數難玩，又試下向個股埋手。噚日舊底班聊天室戰友提過出滙控(00005)好倉，見到日線圖都覺得正，不過要喺呢啲市搵殘爆股話易唔易，話難唔難，你見騰訊、美團(03690)、阿里(09988)唔殘咩？但吼低開好倉係有難度，隨時一個唔該今晚又話比你知唔知啲乜嘢要整頓，到時真係頭都痕。
ATMX頭三隻(順次序分別代表阿里、騰訊及美團)變咗真‧ATM，唯獨得返X(小米(01810))彷彿有啲企得穩。
日線圖上小米噚日出咗接近「十字星」，截至10點13分止，今日再出粒小陽燭，同步見Slow STC(14,3)%K線雖然未確認低位升穿%D線，但至少%K線有landing嘅情況，依家再見到恒指已經由低位回升上去，小米五分鐘都見股價直上，Slow STC(14,3)直奔向超買範圍，可恨小時圖Slow STC(14,3)%K線確認低位升穿%D線兼有動力(斜度夠高)，問題可能在於小米小時圖有無計上破20小時線(小時圖20線)。
小米牛(60004)，收回價24元，同現價有逾7%差距，逾9倍槓桿都夠Day trade用，安全啲留意返小米五分鐘圖Slow STC(14,3)回返落去超賣位時先至出手；進取嘅一旦見到五分鐘圖小米失心瘋踩住天線上而發力的話，小注去追啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
