2021年7月5日
今朝起身個天暗到呢，但好慢又再出返個太陽嚟，走勢同今朝條恒指一樣，開市先跌211點，指數落到28098點，先殺首兩層牛證街，呢兩層加埋嘅街貨相當期指張數都已經有過1500張，而最貼價28000至28099點就已經係重貨區，本以為指數會繼續向下再殺落去，心急開淡倉就大獲啦，事關去到依家9點45分，恒指好快已經縮返上去，再過多五分鐘，恒指已經轉跌為升至升8點，報28319點。
喺恒指五分鐘圖上見，今朝恒指裂口低開之後回彈，至依家9點51分已見指數補返今朝早嗰裂口，但暫時見保歷加通道頂仲未有拓闊嘅情況，以五分鐘圖做Trade的話，呢啲位真係企喺度唔知點算好，還好聊天室戰友呢啲位先行食牛，唔貪心幾格都係錢。
做中長線嘅或者都係等緊恒指日線圖上嘅走勢，誠上個星期所指，恒指喺日線圖行緊個大型嘅「楔形」，上星期五(7月2日)恒指一支「大陰燭」，令指數嘅位置進一步靠近「楔形」底線，至今日再睇其實恒指粒燭真係啱啱好踩住「楔形」底線，同步見Slow STC(14,3)勢頭keep住向下，怕且都未過埋今日先知道指數日線圖穿唔穿呢個位。
再望返恒指五分鐘圖，見到指數上到保歷加通道頂之後稍為回落，不過到去10點7分，聽住Ian隻歌，見到指數踩住保歷加通道中軸作勢再上；而小時圖都出咗第二粒燭，暫時已見指數有跌定嘅情況，重點反而喺Slow STC(14,3)，見到%K線低位回升穿%D線，兩線勢頭均呈上，只係可惜暫時見到嘅上升動力好似未係好勁(兩線上行的斜度唔算好高)。
再睇返恒指五分鐘圖，見到保歷加通道其實由開市到依家都無明顯拓闊過，再加埋小時圖Slow STC(14,3)又未給力，同埋日線圖又剛好踩住「楔形」底，唔好話我哋未諗掂條恒指，怕且條恒指佢自已都未諗掂今日點行。
食住花生有著數呀。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
