2021年7月2日
放假前揀咗恒指牛熊各一，其中只得恒指熊(68807)落到場，主要原因係小時圖上未見Slow STC(14,3)低位回升，所以另一隻恒指牛(53635)全程坐喺後備席，後備到全日完場時都根本無位落過。至於(68807)，星期三(6月30)日喺【輪證下半Part】度講咗幾時食就隨閣下喜歡，如果揸到今日的話，隨時今日夠數買個蛋糕同支香檳慶祝下。
依家10點4分，喺聊天室上同大家講咗索性出淡倉順勢追恒指落，都廢事向高難度動作偷位出好淡，事關見到恒指小時圖Slow STC(14,3)完全無低位回升嘅跡象，再者，即使今朝見到恒指牛熊證街貨圖上有三層新增熊證上場，但以星期三恒指收市價計，指數本身已經企喺牛證街貨層，本以為指數會喺開市後彈一彈先至再回落，但如聊天室戰友話齋真係頭也不回，唔緊要，反正喺嗰段時間嚟追淡倉的話，除非本身手持淡倉過夜，否則市落得咁急隨時再係咁追價追到懷疑人生。
Day trade向下追殺牛證呢個策略爬格仔係適用，但之前都有喺【輪證贏家】度用恒指日線圖畫過依家恒指係行緊一個大型「楔形」，星期一(28日)指數處於「楔形」頂，至今日依家呢一刻指數已經回落到接近「楔形」底，無錯！因為恒指行到呢度似係接近「楔形」嘅尾聲，一旦「楔形」兩線匯合，「楔形」變「三角形」，而兩個形態都係有待變/待爆嘅意思，「真心爆單邊？」恒指波幅指數(VHSI)都話有可能。
睇返條VHSI，見到指數喺星期三Slow STC(14,3)都仲係處於超賣範圍，但%K線仲未升穿%D線。至到今日終於都見到VHSI上嘅Slow STC(14,3)出現低位回升，不過日線圖見VHSI依家彈到上保歷加通道中軸前面，仲有無氣力再去？咁就真係要返轉頭問下恒指「喂！你玩完個『楔形』未呀？」
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
