2021年6月24日
依家9點52分，恒指開市升48點，報28865點後，至依家升幅略為擴大至升110點，重上28900點以上水平。無疑以噚日恒指收市價28817點計，指數的確係近熊證街貨區，上行確實有道理；再者，今日再睇返牛熊證街貨圖分布，喺熊證上最貼價層為28900至28999點，呢度有相當於819張期指，雖然唔係重貨區(重貨區喺30000至30099點，有相當於843張期指)，但呢一層已經係第二重貨區，而且都係最多新增街貨層，見依家恒指五分鐘圖上指數沿住50分鐘線(五分鐘圖10線)向上慢慢移動，就算50分鐘線支持力有限，都仲有條100分鐘線(五分鐘圖20線)做back up。
不過，當見到小時圖嘅時侯，就擔心指數係唔係又想放過近肥熊，事關喺小時圖上見到指數由噚日一口氣彈高逾500點之後，指數已經行到上保歷加通道頂層，同時Slow STC(14,3)都上到嚴重超買水平，今日再見小時圖Slow STC(14,3)已見%K線高位跌穿%D線，只係保歷加通道頂線仍然向上拓高。
的確又係一個技術分析 VS 街貨圖，根據過往經驗，十次有九次都係街貨圖勝，依家10點17分，返去睇返五分鐘圖見指數已經踩住100分鐘線再向上彈高，而Slow STC(14,3)回落至接近中軸水平時%K線再次上破返%D線，且兩線向上再彈。
恒指牛(53918)，收回價28448點，同現價有逾480點差距，約60倍槓桿適合day trade用，留意恒指五分鐘圖50分鐘線或100分鐘線嘅支持。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
