2021年6月15日
有follow開【輪證贏家】facebook嘅讀者都知，上個星期五(6月11日)喺【輪證下半Part】貪心鬼出隻恒指牛(66037)，不消兩個回合喺五分鐘圖上見不破保歷加通道中軸後又再下行，臨收市前10分鐘見指數再次上破保歷加通道中軸，但再比多五分鐘之後，就發現SlowSTC(14,3)再次出現無力嘅情況，為免一過夜就要連過三日，(66037)的確走為上仗，以(66037)喺Patreon出文時間(上星期五2點59分)至臨收市前五分鐘計，證價都係做緊$0.045，當日睇就得個吉；依家睇就真係執身彩，正如聊天戰友所講「勢色唔對就要走，勿留戀」，態度正確。
今朝未開市，同聊天室戰友一齊睇街貨圖，見指數以上週五收市價計近上方熊證街貨，再加上睇到日經今朝早都有200幾點嘅升幅，只係分鐘圖未見有明確方向；再到完咗U盤，恒指彈升百零點開市，再28900點以上水平，係估到指數會稍為回落，但乃念指數開市價已踩住熊證第一層，SlowSTC(14,3)都呈上，本以為指數喺正式開市後會回一回之後再踩唔知邊條天線再去，結果完全相反，彈都唔彈、高檯跳水般向下插，至依家10點16分，恒指報28486點，跌355點，首兩層牛證街貨已全數收回，呢度有相當於659張期指，最貼價層變成28400至28400點，為牛證大里貨區，有相當於1071張期指，不過，如果你手持嘅牛證，收回範圍喺呢一層嘅話，你估你走咗未？所以又如聊天室另一位戰友所講「係殺就快啲啦，唔係28400牛已雞飛狗走無肉食」。
睇返恒指五分鐘圖，今日以直落無水花、接近90度正角方式向下走，無話心唔心寒，本身抱住一個等機會出好倉嘅心態，只不過係等咗接近一個鐘都未出到咁解；「咁miss咗咁大條『下降通道』肉唔肉赤呀？」真係千祈唔好咁諗，正如大家話齋：市，日日都開嘅。
今日恒指日線圖暫時睇的確好肉酸，久違了的「大陰燭」出現向下穿支持咗好耐嘅20天線(28829點)同50天線(28735點)，目前下方得返最近嘅一條天線150天線(28269點)同埋保歷加通道底部(28180點)，SlowSTC(14,3)勢頭都keep住向下，望望月曆，6月剛好過咗一半，假使指數要順依家個勢繼續向下的話，就真係唯有望住150天線或保歷加通道底部。
「咁Day Trader點玩呀？」哼！真係有難度，依家10點35分，回顧指數喺五分鐘上紎10點20分至10點25分，兩支燭嘅低位分別為28455點同28453點，出現咗一個爭兩點嘅「平底」；用埋呢兩支燭嘅高位計(分別為28516點同28453點)，又似「曙光初現」形態(如果10點25分支陽燭嘅燭身同10點20分嗰支陰燭嘅燭身差唔多大就最完美啦)，Anyway，兩個都係底位回升嘅格局，恒指牛(62258)，收回價27800點，同現價有逾680噩差距，企遠啲安全啲，49倍槓桿夠DT玩，目前五分鐘圖見恒指上破咗50分鐘線(五分鐘圖 x 10線)，SlowSTC(14,3)勢頭呈上，安全啲可以等佢再彈得穩啲時先至出手，怕佢呢下上破只係呃我入牛。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon【每日一股】：https://www.patreon.com/cbbcwar
秒投輪證教室：https://bit.ly/31HG6AN
