2021年6月9日
噚日開緊會時見到恒指尾市好似愈升愈有，不過升幅比較緩慢，貪心鬼偷睇返噚日隻恒指牛(66658)，尾市時段有做過$0.036至$0.035，比起噚日平均走貨價再多兩至三格，心臟還可以頂得住。
成個星期都係天陰陰，天文台就日日都話有雷暴同驟雨，可能只係我出門口嘅時間撞唔正佢啲雷暴同驟雨，還好恒指暫時未見有雷暴同驟雨，喺9點59分見到指數於五分鐘圖上仍然沿住保歷加上升通道運行，只係SlowSTC(14,3)喺中軸至超買位上上落落中。
開咗市成半個鐘都係得嗰幾十點上落，更重要嘅係見到保歷加通道口根本就無拓闊亦都無收窄，慢行向上嘅狀態得兩個方法可以處理：1.向個股埋手；2.向小時圖埋手。
今朝都有聊天室戰友提出可唔可以用小時圖打恒指好倉主意，的確，用小時圖去對付像隻蝸牛嘅恒指係理想嘅方法，但留意返小時圖由上周四(6月3日)中午12時打後至依家，指數一直都無上破過保歷加通道中軸。依家10點11分，小時圖今日出咗第二粒燭，見到仍然咬住保歷加通道中軸但都仲未有力氣上破企穩上去。再者，小時圖保歷加通道由噚日至依家見走勢有收窄至keep住橫行嘅情況，安全策略可以等小時圖上破保歷加通道中軸後再追好倉都唔遲；反正以依家恒指做緊嘅28771點計，現價的確近下方牛證嘅街貨。
「既然下方牛證街貨多，而且目前恒指點數又近牛證街貨，何不索性見恒指小時圖確認破唔到保歷加通道中軸後開淡倉？」又係另一種inspire，我困得太耐啦，恒指熊(68807)，收回價29450點：同現價有逾600點差距，槓桿比率約33倍，DT嚟講10.18%街貨 it doesn't matter！留意小時圖上破唔到保歷加通道中軸先至出手淡倉；相反，佢咁叻可以破得到嘅話，咪反手囉，be water啫！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
